Плетена погача: кога ви идат гости и ви треба нешто брзо, но вкусно и убаво да направите

Станува збор за навистина преубава погача и за вкус и за изглед. Ја направив додека бевме во викендицата, имавме гости за ручек. Замесив тесто а не знаев што и како да направам. Си реков дека мора нешто набрзина да смислам, а времето лета, нема мене да ме чека… Ќе направам плетенка, си помислив, тоа ми е најлесно. Кога го зедов тестото во раце, се’ течеше како подмачкано. Направив плетенка и од неа погача, ама необична. Пробајте ја ако сакате, ќе ви ја објаснам детално и ќе видите дека навистина е едноставна.

Потребни состојки:

Околу 800 г брашно
1 коцка свеж квасец /40г/
200 мл топла вода
150 мл јогурт
100 мл масло
1 лажичка шеќер
2 лажички сол
2 јајца + 1 белка
200 г путер или маргарин за премачкување на корите
околу 400 г издробено сирење за фил
1 жолчка за премачкување на погачата + 2-3 лажици масло
сусам и сончогледови семки за наросување

Постапка:

Од наведените состојки се замесува мазно тесто. Значи се активира квасецот во млака вода со шеќер и малку брашно, се додава замлачен јогурт и масло, јајцата и белката, па со постепено додавање на брашното се замесува средно меко тесто кое не лепи на раце. Тестото се остава да одмора додека се намасти тепсијата и се издроби сирењето. Потоа го делиме на три еднакви делови.

Loading...

Секој дел се развлекува со оклагија во правоаголна форма, па кората се премачкува со путер, а на двата краја се реди издробено сирење, како на фотографијата. Од двете страни се витка кон средината. Истата постапка се повторува и со останатите два дела.

Сите три краеви ги спојуваме, па плетеме плетенка, нежно, внимателно, без притискање. Плетенката ја виткаме во круг, а крајчињата ги ставаме под погачата. Потоа ја префрламе во намастена тепсија 32 см.

Готовата погача се премачкува со разматена жолчка на која сме додале 2-3 лажици масло, а одозгора наросуваме со сусам, сончоглед или нешто по желба. Погачата се остава да кисне за да се удвои, па потоа се пече на 200 степени околу 15 минути и уште 30 минути на 180 степени. Најубава е кога ќе добие румена боја.

Loading...