На наше огромно задоволство, специјално за читателите на НМД.мк, ќе ви претставиме неколку рецепти од Сузана Спасовска од Пробиштип, која објасни како се добива пепелова вода, зошто е добра и како се употребува. Се чини дека пепеловата вода може да се искористи на многу корисни начини.
„Пепелта се користела и се користи во готварството. Таа е основната тајна на италијанските тестенини. Во Италија се користи пепел од маслинови стари дрвја и гранки од окроените маслинови дрвја. Кај нас се практикува од дабови и букови дрвја.
Боровина не се користи, бидејќи содржи смола. Кога се прибира пепел за готвење, потребно е да не се горат хартии или пластични шишиња. Оладената пепел се просејува низ сито. Се собира во хартиени кеси“, објасни Сузана Спасовска и ја опиша постапката за добивање на пепеловата вода.
ПРИГОТВУВАЊЕ НА ПЕПЕЛОВА ВОДА: Во пластична вангла се ставаат 2-3 црпалки (лопатки за брашно) пепел, па се налева 2-3 литри чиста ладна вода. Се промешува со дрвена лажица и се покрива со чиста крпа, па се остава преку ноќ да се избистри водата. Наутро се процедува низ газа, внимателно, да не се замати. Ако е потребно, после еден час уште еднаш се процедува. Тоа е пепелова вода – Цек.
УПОТРЕБА: Пепеловата вода се користи за месење на разни тестенини, како јуфки, тарана, пити и разни посни колачи. Го заменува млекото. Значи, колку ви е потребно млеко, толку ставате од оваа вода. Водата содржи натриум и калциум карбонати.
Инаку, натриумите се природен конзерванс, додека калциум карбонатите го заменуваат прашокот за печиво, а истовремено има благотворно влијание при варењето на храната, односно од храната приготвена со пепелова вода – не боли желудник.
ТАТЛИЈА (ЏУНЏУЛЕ) – Рецепт и фотографија на Сузана Спасовска.
ПОТРЕБНИ СОСТОЈКИ: 700 г брашно, 200 мл масло, прстофат сол, едно јајце, 1 кесичка прашок за печиво, рендана кора од еден портокал и пепелова вода по потреба. Постапка: Од наведените состојки се замесува средно меко тесто. Се дели на 15 топчиња. Секое се развлекува колку мала чинија и притоа се наросува со нишесте.
Сите кори се редат една врз друга, а помеѓу се наросува скроб (нишесте/густин), колку повеќе, толку подобро (вкупно 300 г). Кога ќе се соединат сите кори, се развлекуваат сите заедно и одеднаш во една кора со дебелина од 7-8 мм. Се сечат ленти со ширина од 5 см. Се формираат цветови набирајќи ги како карнер во круг. Се редат во тепсија бр.34 почнувајќи од средината.
Се повторува постапката додека да се исполни целата тепсија. Се печат 10 минути во претходно загреана рерна на 200 степени, а потоа се намалува температурата на 170 степени и се печат уште 20 минути. ЗА ШЕРБЕТ: 800 г шеќер и 700 мл вода се ставаат на оган, па откако ќе зоврие се вари на умерена температура 10 минути.
Потоа се додава исцеден сок од еден портокал, 1 кесичка ванилин шеќер, 3-4 тркалца и лимон и се остава да врие уште 2-3 минути. Шербетот е најдобро да се приготви претходно за да има време да се олади. Печената татлија додека е врела се прелива со ладниот шербет. За декорација се наросуваат 50 г лупени цели лешници.
ТАТЛИЈА НА ВИЉУШКА – Рецепт и фотографија на Сузана Спасовска.
Рецептот е ист како претходниот со таа разлика што се сечат ленти со должина од 10 см и се вртат на виљушка, а потоа се пржат во длабоко масло на умерена (средна) температура. Пржени се ставаат во ладен шербет, 5-6 минути, а потоа се редат во плех. Кога ќе се завршат сите, остатокот од шербетот се прелива во плехот.
СУШЕЛКИ ОД ЈАПОНСКО ЈАБОЛКО – Рецепт и фотографија на Сузана Спасовска.
Се одбираат јаболка со гранче за да има за што да се подврзат. Се лупат, па се врзуваат на конец. Во тенџере се зоврива пепелова вода и во неа се ставаат низите од јаболка. Се држат по 3-4 минути, а потоа се вадат од водата и се закачуваат на проветно, покриено место. Вака се оставаат неколку дена додека да се исушат, а потоа се собираат во хартиени кеси и се чуваат за коледе и бадник.
Ако имате повеќе вакви јаболка може да се направат божиќни колачиња: се мелат сувите јапонски јаболка, се додава 100 г шеќер во прав, 50 г суво грозје, 100 г мелени лешници и 100 г мелени бадеми. Се замесува убаво тесто од кое се прават топчиња и се валкаат во мелени лешници или ореви.
