Гравче тавче со колбаси
Гравче тавче е традиционално македонско јадење што зрачи со топлина и домашен вкус.
Оваа варијанта со колбаси внесува дополнителна сочност и арома, правејќи го идеален избор за семеен ручек или свечена пригода.
Подгответе се да уживате во богатите вкусови на тетовското гравче, зачинето со внимателно одбрани состојки и печено до совршенство, пишува НМД. Еве што ви е потребно:
Потребни состојки
– 500 г тетовски грав
– 400 г кромид
– 2 чешниња лук
– 1 лажичка сол
– 1 лажичка сув зачин
– 1 лажичка црвена слатка пиперка
– 150 мл масло
– 100 мл сок од домати
– неколку зрна црн пипер
– 2 ловорови листа
– колбаси по желба
– НМД
Постапка
1. Гравот потопете го во ладна вода и оставете го да отстои најмалку 2 часа, идеално преку ноќ. Потоа, исцедете ја водата, ставете нова вода и варете го гравот околу 10 минути.
Повторно исцедете ја водата и налејте нова, така што водата да биде околу 2 прста над гравот.
2. Во водата додајте сол, сок од домати, зрна црн пипер и ловорови листа. Варете го гравот на тивок оган додека да омекне, односно додека водата почне да се заматува, а зрната да почнат малку да пукаат.
3. Кромидот исечкајте го на ситни ливчиња и пропржете го на масло додека да омекне. Додајте ситно сечкан лук и црвена слатка пиперка, па промешајте. На крај, додајте сув зачин и добро измешајте.
4. Пропржениот кромид додајте го во тенџерето со гравот и внимателно промешајте без да се распаднат зрната.
5. Смесата префрлете ја во земјен или друг соодветен сад за печење. Печете во рерна загреана на 200°C додека на површината да се формира лесна кора.
6. Кога гравот ќе почне да добива кора, наредете ги колбасите врз него и продолжете со печење додека да добијат убава златно-кафеава боја.
7. По печењето, оставете го јадењето во исклучена рерна уште кратко време за да се соединат сите вкусови.
8. Послужете топло со домашно лепче и уживајте во овој прекрасен македонски специјалитет! Постапката погледнете ја во видео прилогот ОВДЕ:
