„За толчен пинџур нема сезона; дали е лето или зима, секогаш е добредодејден на трпезата“, вели нашата драга членка Natalie Gajduk-Bikoff која го сподели рецептот во групата НМД рецепти.
Пинџурот е омилената македонска мезе-салата која најчесто се послужува летно време. Но, како што вели Натали, за оваа салата нема сезона, па се приготвува во секој период од годината.
Еве како пинџурот го приготви Натали: „ Истолчив 12 благи печени пиперки, 3 лути, 8 печени домати и 1 печен модар патлиџан. Додадов 5 толчени чешниња лук, сол, бибер и полеав со врело масло. Убаво сирење и р‘жано лепче на страна и не можеш да престанеш да јадеш“. Во продолжение прочитајте го рецептот и на Снежана Бошкова:
Ова е омиленото макало кое може да се послужи самостојно или како прилог со главното јадење. Кога ќе почнете да го јадете, нема застанување… Толку многу е вкусно! Фотографија и рецепт на Снежана Бошкова.
Потребни состојки: 20-тина зелени пиперки (може неколку лути пиперки, по желба), 10- тина чешниња лук, 3-4 црвени домати, *може и 1-2 модри патлиџани, магдонос по желба, масло за јадење и сол по вкус
Постапка: најпрво измијте ги пиперките, избришете ги и испечете ги убаво од сите страни. Печените пиперки ставајте ги во кеса и оставете ги така да изладат. Потоа излупете ги и извадете им ги семките.
Исто како пиперките, така и доматите запечете ги на оган. Лукчето убаво излупете го, исечкајте го ситно, посолете го и убаво истолчете го. Пиперките исечете ги на помали парчиња, па и нив постепено додавајте ги во лукот и толчете ги.
Толчете ритмично и еднакво за да спојат вкусовите. Потоа додавајте ги исечените домати, па заедно убаво промешајте. Посолете по вкус.
На оган ставете малку масло да се загрее. Кога маслото ќе почне да зоврива, попарете го одозгора пинџурот и убаво промешајте. Оставете некоја минута убаво да се впие маслото и да се соединат вкусовите. Послужете со ситно сечкан магдонос. Фотографија и рецепт на Снежана Бошкова
ВАШИ КОМЕНТАРИ:
Коментар на Панче Иванов: „Може да се користи како салата, а може како јадење со домашно сирење. Може да се додаде и модар патлиџан, се разбира печен, па пинџурот ќе добие уште повеќе на вкус. Пријатно.“
Коментар на Живка Ангеловска: „Три килограми зелен пипер, лут или благ, два килограми црвен домат и два-три модри патлиџани, зависи од големината.
Сè се пече, малку се исцедува во цедалка, па се ситни и се става во сад за толчење, каде претходно е истолчен лук по желба заедно со сол. Убаво се толчи целата смеса. Се загрева маслото и се прелива смесата, се промешува и се остава малку да отстои. Пријатно.“
