За сите љубители на кокосот, ова е вистинско уживање!

Потребни состојки: 4 јајца, 8 лажици шеќер, 1 ванилин шеќер, 6 лажици брашно, 1 кесичка “2 во 1” кафе, 1 лажица какао, 1 прашок за печиво, 100 мл масло и 100 мл вода. За крем: 1 литар млеко, 7 лажици остро брашно, 150 г шеќер, 150 г путер, 150 г кокос. И уште: кокос за наросување

Постапка: Секогаш кога приготвувам колачи кои содржат крем кој мора да се излади па да му се додаде путерот, тогаш најпрво го правам кремот, па дури потоа кората за во меѓувреме тој да се излади.

Значи, прво разматете го брашното за кремот со 200-300 мл ладно млеко за да добиете смеса без грутчиња, а остатокот од млекото заедно со шеќерот ставете го да зоврие. Смесата со брашното истурете ја во врелото млеко со постојано мешање и гответе додека да згусне. Потоа тргнете го кремот на страна за да излади.

За кора: Изматете ги јајцата со шеќерот и ванилата со миксер, да бидат пенасти. Измешајте го брашното, какаото, прашокот за печиво и кафето “2 во 1”. Постепено, лесно мешајќи, додавајте во изматените јајца.

На крај, многу полека додадете и промешајте масло и вода. Во тепсијата ставете хартија за печење, па преку неа излејте ја приготвената смеса за кора. Ставете да се пече на 200 степени околу 20-тина минути или проверете со чепкалка дали е печено.

Кога кремот е изладен, во него додадете путер на собна температура, па добро изматете со миксер. Ќе добиете многу убав воздушест крем. На крај додадете го и кокосот.

Кога кората е печена прекријте ја тепсијата со некоја тацна, па превртете ја за да падне кората на неа. Отстранете ја хартијата и рамномерно размачкајте го кремот врз неа. Одозгора наросете кокос, па ставете во фрижидер убаво да се ислади. Потоа сечете го на коцки и послужете.