Памук колач со кајсии што се топи во уста – едноставен рецепт кој сите го бараат ова лето
Доколку барате лесен, миризлив и сочен десерт кој совршено ги истакнува вкусовите на сезонското овошје, овој памук колач со кајсии е вистинскиот избор.
Подготвен од состојки кои речиси секогаш ги имаме дома, овој колач плени со својата воздушеста структура, нежна текстура и освежителен овошен вкус.
Идеален е за семејни собири, попладневно кафе или како сладок завршеток на летниот ручек, пишува НМД. Еве што ви е потребно:
Потребни состојки:
* 4 јајца
* 1 чаша шеќер (200 мл)
* 1 кесичка ванилин шеќер
* 1 чаша масло (200 мл)
* 1 чаша течен јогурт или кисело млеко (200 мл)
* 3 чаши брашно (мерени со чаша од 200 мл)
* 1 кесичка прашок за печиво
* 500 г свежи кајсии
* шеќер во прав за посипување
Начин на подготовка:
Јајцата изматете ги со миксер додека не станат пенести. Постепено додавајте го шеќерот и матете додека смесата не стане густа, светла и воздушеста. Потоа додајте го ванилиниот шеќер.
Во смесата сипете ги маслото и јогуртот, па продолжете со матење додека состојките целосно не се соединат.
Додајте го брашното и матете додека не добиете мазна смеса без грутчиња. На крај вмешајте го прашокот за печиво. Треба да добиете полутечно, но доволно густо тесто.
Кајсиите измијте ги, отстранете ги семките и исечкајте ги на помали парчиња.
Калап или плех со средна големина намастете го со малку масло. Истурете ја подготвената смеса и рамномерно распоредете ја. Одозгора наредете ги парчињата кајсии и лесно притиснете ги за делумно да навлезат во тестото.
Печете во претходно загреана рерна на 180 до 190 степени околу 35 минути, односно додека колачот не добие златнорумена боја. Проверете ја печеноста со чепкалка.
Оставете го колачот кратко да се излади, а потоа посипете го со шеќер во прав и послужете го.
Совет плус:
За уште побогат вкус, можете да додадете малку рендана кора од лимон или прстофат цимет. Колачот останува мек и следниот ден, што го прави одличен избор за појадок или ужина со кафе и чај.
Постапката погледнете ја во видео прилогот ОВДЕ:
