Влашка лутеница
Влашката лутеница е традиционален рецепт кој го спојува богатството на печените домати со пикантноста на лутите пиперки и слатко-киселиот баланс на шеќерот и оцетот.
Оваа зимница е совршен додаток на секоја трпеза, особено во комбинација со топол домашен леб и квалитетно овчо сирење. Подгответе ја оваа сезона и уживајте во нејзиниот уникатен вкус, пишува НМД. Еве што ви е потребно:
Потребни состојки
– 15 кг домати
– 4 кг везени пиперки (благи и лути по вкус, 3 кг + 1 кг)
– 600 г шеќер
– 700 мл вински оцет
– 600 мл масло
– 2 китки магдонос
– 1 главица лук, ситно сечкана
– Сол по вкус
– Црн пипер по вкус
– НМД
Постапка
1. Доматите измијте ги и распоредете ги во еден слој во тепсии за печење. Печете ги во загреана рерна на 200 степени Целзиусови околу 40 минути, по две тепсии одеднаш.
2. Откако ќе се изладат, исцедете ја течноста од доматите, излупете ги и изблендирајте ги во блендер.
3. Смесата од домати процедете ја низ цедалка за да ги отстраните лушпите и семките.
4. Ставете ја смесата да се вари на средна температура околу еден и пол час.
5. За тоа време, измијте ги везените пиперки и исечкајте ги на тркалца.
6. Во смесата од домати додајте го шеќерот, винскиот оцет, маслото, солта и црниот пипер по вкус. Потоа додајте ги исечканите пиперки и продолжете со готвење уште 25 минути.
7. На крај, додајте го ситно сечканиот лук и магдоносот. Промешајте и проверете го вкусот, по потреба додајте уште сол или бибер.
8. Готовата лутеница соберете ја во чисти и суви тегли, затворете ги со чисти капаци, превртете ги да се вакунираат и потоа оставете ги покриени со ќебе да се изладат.
Уживајте во подготвувањето на оваа вкусна зимница!
