Кокосови колачи со џем за брза подготовка
Овие кокосови колачи со џем се совршен избор за оние моменти кога сакате да подготвите вкусен десерт за кратко време.
Со само пет минути подготовка и десет минути печење, ќе добиете меки и ароматични колачи кои ќе ги воодушеват сите.
Нивната едноставна подготовка и примамлив изглед ги прават идеални за секоја прилика, пишува НМД. Еве што ви е потребно:
ПОТРЕБНИ СОСТОЈКИ:
– 2 јајца
– 100 г шеќер
– 1 кесичка ванилин шеќер
– 100 мл масло
– 280 г брашно
– 15 г прашок за печиво
– 3 лажици џем од кајсија
– малку вода (за разредување на џемот)
– 50 г кокосово брашно
– НМД
ПОСТАПКА:
1. Во подлабок сад, со жица за матење или виљушка, изматете ги јајцата со шеќерот и ванилиниот шеќер додека смесата стане пенеста и хомогена.
2. Додајте го маслото и продолжете да мешате за да се соединат состојките.
3. Постепено додајте го брашното и прашокот за печиво. Мешајте со лажица додека смесата се соедини, а потоа замесете ја со рака. Тестото треба да биде компактно и нелепливо.
4. Со лажица земајте од тестото и обликувајте топчиња со големина на орев. Наредете ги во плех обложен со хартија за печење, оставајќи мал простор меѓу нив.
5. Печете ги колачите во претходно загреана рерна на 200 °C околу 10 минути или додека добијат лесна златна боја, но да останат светли.
6. Во меѓувреме, во еден сад измешајте го џемот од кајсија со малку вода за да добиете течна глазура. Во друг сад подгответе го кокосовото брашно.
7. Откако колачите малку ќе се изладат, потопувајте ги во разредениот џем, а потоа валкајте ги во кокосово брашно.
8. Наредете ги готовите колачи на послужавник и оставете ги целосно да се изладат пред сервирање.
Овие колачи се одлични за уживање со кафе или чај, а може да експериментирате со различни вкусови на џем за да добиете нови комбинации. Добар апетит! Постапката погледнете ја во видео прилогот ОВДЕ:
https://youtu.be/aqqPyIy55F0?si=V8JPC7LP3kDyOSu8
