СЛАТКО ОД ЦРЕШИ…после „Рејчл“ и слаткото од дуња, ова ми е омилено…Многу убаво слатко од цреши какво што го правеа нашите баби.
Потребни состојки:
1 кг цреши
1,25 кг шеќер
1-2 кесички ванилин шеќер
200 мл вода
1 лимон
Постапка:
Црешите измијте ги и извадете им ги семките. Додека ги чистите црешите за да не потемнат, веднаш спуштајте ги во ладна вода во која сте додале лимонтус или лимонов сок
Шеќерот сварете го со чаша вода, да добиете густ сируп.
Во шеќерниот сируп додајте ги црешите и лимонот исечен на тркалца и варете додека црешите да бидат сварени а сирупот толку густ да од лажицата капнува а не тече.
Покријте го тенџерето со мокра крпа и оставете да се лади преку ноќ, а следниот ден слаткото складирајте го во чисти суви тегли.
Секоја година правам слатко од цреши, и често ми се случува да го оставам сирупот редок, па после кога ќе ги додадам црешите мора подолго да ги варам за да испари водата и ми се случува да ги преварам.
Затоа, внимавајте сирупот кога ќе го сварите да биде доволно густ за да не морате црешите долго да ги варите.
