Раванија со кисело млеко

За љубителите на старински колачи со шеќерен сируп. Овој колач има разни називи: нутма, лутма, раванија, рахванија, севдиџан, федер-пита, а сите тие се во суштина исти, а се разликуваат многу малку во состојките.

Ако ви се допаѓа пробајте го овој колач.

Потребни состојки:

5 јајца
12 лажици шеќер
1 ванилин шеќер
1 лимон – сок
12 лажици масло
12 лажици кисело млеко
12 лажици брашно
12 лажици гриз
1 прашок за печиво

За сируп:

500 г шеќер
1 ванилин шеќер
700 мл вода
1 лимон

За наросување: кокосово брашно
тркалезен калап бр.26

Постапка:

Пенасто изматете ги јајцата со шеќер, ванилин шеќер и сок од еден лимон. Брашното, гризот, прашокот за печиво заедно промешајте ги.

Во пенасто изматената смеса од јајца и шеќер постепено додавајте масло и кисело млеко.

На крај полека додавајте брашно во кое сте измешале гриз и прашок за печиво.

Смесата излејте ја во намастен и со брашно наросен плех или тепсија. Ставете во загреана рерна и печете на умерена температура околу 45 минути.

Печената раванија исечете ја на коцки со величина по ваша желба или како баклава, па прелијте со сварен и изладен сируп.

За сируп: шеќерот, водата и ванилин шеќерот варете ги неколку минути. Ако сакате освежувачки вкус може да додадете и неколку тркалца лимон. Сварениот сируп тргнете го на страна и оставете го да излади.

По желба можете да го наросите со кокосово брашно. Добро изладете го пред послужување. Послужете со кафе или ладна лимонада. Колку подолго стои толку е посочна и подобра. Уживајте во вкусот!