Баклава без кори со јогурт: Традиционална посластица со неодолив вкус
Баклавата без кори со јогурт е омилена старомакедонска посластица што отсекогаш ги красела празничните трпези.
Овој едноставен, но неверојатно вкусен десерт се подготвува за околу 45 минути, а неговата сочност и богат вкус ќе ве воодушеват.
Со додавање на јогурт, оваа баклава добива уникатна текстура што ја прави уште повкусна од класичната варијанта.
Совршена е за празнични моменти, како Божиќ, или за секој ден кога сакате да ги израдувате најблиските, пишува НМД. Еве што ви е потребно:
ПОТРЕБНИ СОСТОЈКИ (1 шолја = 250 мл):
За тестото:
– 100 г мелени ореви
– 100 г суво грозје
– 1 чаша јогурт 200 мл
– 1 шолја масло
– 3 шолји млеко
– 3 шолји брашно
– 3 шолји гриз
– 1 кесичка прашок за печиво
За сирупот:
– 400 г шеќер
– 500 мл вода
– сок од 1 лимон
ПОСТАПКА:
1. Подготовка на тестото: Во длабок сад ставете ги мелените ореви, сувото грозје, јогуртот, маслото, млекото, брашното, гризот и прашокот за печиво.
Состојките внимателно измешајте ги со лажица или шпатула додека да добиете хомогена смеса.
2. Печење: Смесата префрлете ја во намастен плех и рамномерно распоредете ја. Загрејте ја рерната на 180°C.
Печете ја баклавата околу 30 минути или додека горната површина да добие златно-кафеава боја. Откако ќе се испече, оставете ја да се излади или, доколку планирате да ја прелиете со ладен сируп, веднаш сторете го тоа.
3. Подготовка на сирупот: Во тенџере ставете го шеќерот и водата, па мешајте додека шеќерот целосно се растопи.
Додајте го сокот од лимон и оставете сирупот да ври на тивок оган 5 минути. Доколку сакате да прелиете топла баклава, сирупот оставете го да се излади. Ако пак баклавата е ладна, сирупот треба да биде топол.
4. Сечење и преливање: Испечената баклава исечете ја на посакувани облици (ромбови, коцки или правоаголници). Внимателно прелијте ја со подготвениот сируп, овозможувајќи ѝ да го впие целосно.
5. Сервирање: Оставете ја баклавата да отстои неколку часа за да се соедини вкусот. Сервирајте ја ладна, по желба украсена со мелени ореви.
Важна напоменa:
За да баклавата остане сочна, внимавајте на температурата при преливањето: топла баклава се прелива со ладен сируп, а ладна баклава со топол сируп.
Оваа баклава без кори со јогурт е идеална посластица за празничните денови, но и за секоја пригода кога сакате да уживате во автентичните македонски вкусови. Добар апетит!
