Бартолиевите жлезди се наоѓаат во внатрешноста на двете срамни усни кои се наоѓаат пред вагината. Тие се одговорни за секретот што се излачува во текот на сексуалниот однос, бидејќи ја влажнат структурата на слузницата.
Околу два проценти од жените во текот на животот ќе искусат воспаление на Бартолиевите жлезди. Најчести проблеми се циста и апсцес. Во зависност од големината на цистата може да варира од мала која не може ниту да се почувствува, па се до големина на топчеста формација која на допир е цврста и се наоѓа до вагиналниот отвор. Цистата додека е мирна не создава проблеми, но кога ќе дојде до воспаление кое е често, се појавуваат симптоми како болка и оток.
Формацијата е болна на допир, за време на одење или седење жената чувствува тапа болка, болки при сексуалниот однос, а може да дојде и до појава на покачена телесна температура. Цистата најчесто се јавува на едната срамна усна и многу ретко може да се јави и случај кога Бартолиевата циста се јавува и на двете страни.
Лекарите велат дека како причина за нејзино појавување е опструкција на изводниот канал која често може да биде проследена со инфекција од некоја бактерија и затоа е неопходно нејзино постојано следење.
Доколку станува збор за асимптоматична мала циста не е потребен никаков третман, бидејќи таа сама ќе пукне за неколку дена. Поголемата циста и апсцес има потреба од дренажа доколку спонтано не прснат и така се самоизлекуваат.
Вообичаено за поставување дијагноза доволно е само визуелен преглед и палпација, но лекарите советуваат и да се направат тестови за половопреносливи болести или брис за евентуално присуство на некои бактерии кои можат да ја воспалат цистата.
Ако се покаже присуство на бактерија се лекува со антибиотска терапија. Но, ако жената има над 40 години можна е и потреба од дополнителна биопсија бидејќи ретко, но понекогаш оваа маса може да биде карцином. Во зависност од состојбата на цистата, гинекологот одредува терапија која може да се спроведе во домашни услови, но често е потребен и хируршки третман за да се издренира содржината на големите цисти.
Како прва помош за олеснување на болката и намалување на воспалението се препорачува испирање на гениталната област со млак чај од камилица, која делува противоспалително, ја негува слузницата и ги ублажува отокот и болката. Но, ако видите дека состојбата се влошува, дека болката и отокот се зголемуваат или дека имате покачена телесна температура јавете се кај својот гинеколог.
Извор: Панацеа
