Праскички – неодолив класичен десерт
Праскичките се традиционален колач кој со својата крцкава текстура, богат фил и шарен изглед освојува на првиот залогај.
Овие миризливи колачиња, совршени за празнични трпези, слави или едноставно за уживање со најблиските, се подготвуваат со леснотија, а резултатот е секогаш импресивен.
Следете го овој детален рецепт за да создадете совршени праскички кои ќе ги воодушеват сите, пишува НМД. Еве што ви е потребно:
Потребни состојки
За тестото:
– 2 јајца
– 1 кесичка ванилин шеќер
– 200 г шеќер
– 100 г маст
– 350 г брашно
– ½ кесичка прашок за печиво
– прстофат сол
За филот:
– 5-6 лажици мармалада
– 50 мл рум
За декорација:
– 1 кесичка црвена прехрамбена боја (боја од малина)
– 100 мл вода
– кристален шеќер (по потреба)
– НМД
Постапка
1. Подготовка на тестото: Во длабок сад, со миксер изматете ги јајцата со шеќерот и ванилиниот шеќер додека да добиете пенаста смеса.
Додајте ја маста и продолжете да матите додека смесата се соедини. Во посебен сад измешајте го брашното со прашокот за печиво и прстофат сол.
Постепено додавајте ги сувите состојки во влажните, мешајќи со миксер, а потоа замесете го тестото со раце. Тестото треба да биде меко, еластично и нелепливо.
2. Формирање на топчињата: Поделете го тестото на два еднакви дела. Од секој дел обликувајте валјак и исечете го на еднакви парчиња.
Секое парче обликувајте го во топче со тежина од приближно 14 г за да добиете еднакви праскички. Наредете ги топчињата во плех, оставајќи доволно простор меѓу нив, бидејќи ќе нараснат за време на печењето.
3. Печење: Печете ги праскичките во претходно загреана рерна на 180-200 °C околу 12-15 минути, внимавајќи да не потемнат. Извадете ги од рерната и оставете ги да се изладат.
4. Подготовка на филот: Со остар нож или лажичка внимателно издлабете мал дел од рамната страна на секое колаче.
Издробените трошки соберете ги во сад, додајте 5-6 лажици мармалада и 50 мл рум, па добро измешајте за да добиете хомоген фил.
5. Полнење: Со подготвениот фил наполнете ги издлабените половини од колачињата, користејќи по една лажичка фил за секое колаче. Спојте две половини за да добиете цело колаче во облик на праска.
6. Декорација: Во 100 мл вода растворете ја црвената прехрамбена боја. Секое колаче кратко потопете го од двете страни во обоената вода за да добие боја на праска, а потоа извалкајте го во кристален шеќер за да добиете сјаен изглед.
7. Сервирање: Оставете ги праскичките да се исушат кратко време пред да ги послужите. Чувајте ги во добро затворена кутија за да ја задржат свежината.
Совет: За најдобар резултат, користете вага за прецизно мерење на топчињата и внимавајте на времето на печење за да добиете совршено крцкави праскички.
Уживајте во овој класичен десерт! Постапката погледнете ја во видео прилогот ОВДЕ:
