Локумот е една од омилените слатки која се јаде додека се пие кафето, а се приготвува од скробен гел и шеќер. Постојат разни верзии и вкусови, но базата на оваа оригинална слатка е иста.
Потеклото на локумот не е прецизно познато, но она што се знае дека се производувал во Турција и Персија уште во 18 век. На арапски локумот значи „утеха за грлото“, а несомнено го добило ова име поради слаткиот мазен вкус и нежната текстура.
Има неколку тајни чекори во подготовката на локумот кои ги дознавме од Снежана Годиниќ, па ви го пренесуваме во целост нејзиниот рецепт, како се подготвува највкусниот домашен локум. Не го пропуштајте овој рецепт, запишете си го и во прва пригода направете го. Нема да се покаете, затоа што е еден од најдобрите. Еве што ви е потребно:
ПОТРЕБНИ СОСТОЈКИ: 800 г шеќер, 300 мл вода, сок од половина лимон, 150 г пченкарен скроб/густин/нишесте, 600 мл вода, 2 кесички ванилин шеќер (20 г), 1 мала лажичка арома на ванила (екстракт)
И УШТЕ: 150 г ф’стаци (или ореви, листови од ружа и сечкани јатки по ваш избор), малку боја по желба, шеќер во прав, неколку лажици густин, масло за подмачкување на калапот (обично правоаголен плех за да се сече на квадари или коцки)
ПОСТАПКА: Намастете го калапот со тенок слој масло и врз него ставете проѕирна-стреч фолија и оставете го вака подготвеен настрана додека да го сварите локумот. Шеќерот и 300 мл вода измешајте ги заедно со лимоновиот сок и варете 10 минути на највисока топлина без мешање.
Кон крајот на готвењето, кога ќе забележите дека сирупот веќе е сварен (ќе забележите по крупните меури кои се појавуваат на површината), во друго тенџере или тава измешајте 600 мл вода и густин, да нема грутчиња.
Оставете да зоврие со непрекинато мешање исто како кога варите пудинг, додека да ја згусне. Готово е кога ќе добиете густа желатинозна смеса како гел. Варењето на скробот трае кратко време, затоа немојте да го правите тоа премногу однапред, туку веднаш кон крајот на готвењето на сирупот.
Подобро е сирупот да почека малку подолго отколку скробниот гел. Се трга од оган и во него постепено се додава врелиот шеќерен сируп, во тенок млаз додека непрекинато мешате со жица-маталка.
Вратете го тенџерето на шпоретот, намалете ја температурата на 4 од 9 и варете 40 минути со повремено промешување за да не загори на дното. По 40-тина минути смесата треба малку да пожолти. Потоа истурете ја аромата (ванила) и бојата или додајте сечкани ореви/фстаци или што сакате по ваш избор и вкус.
Промешајте за рамномерно да се распоредат, па кога сè ќе соедините, истурете ја смесата во подготвениот калап и израмнете ја површината. Оставете го непокриено 24 часа. Потоа наросете го го со пеосеана мешавина од густин/скроб/нишесте и шеќер во прав, па исечете го на коцки или квадари.
Во истата просеана мешавина од скроб и шеќер во прав (на 50 г шеќер во прав се става 15 г густин/скроб/нишесте), валајте ги коцките локум додека убаво да се обложат од сите страни. Оставете ги на послужавник одвоени една од друга да се исушат најмалку два дена за да се создаде убавата тенка коричка/мембрана што сите ја сакаме.
Ако локумот го впие шеќерот, повторно валајте ги парчињата во смеса со шеќер и скроб и повторно оставете ги разделени да се просушат. Потоа складирајте ги во кутија која на дното сте ја наросиле со мешавината, а помеѓу секој ред редете парчиња масна хартија (за печење).
