Ова се најдобрите домашни крофни кои не впиваат масло, а остануваат меки и свежи дури и следниот ден, а овој рецепт секогаш успева. Обожавам домашни крофни, зашто според мојот вкус, секогаш ги преферирам пред купечките.
Притоа, од оваа смеса излегуваат 32-33 крофни, а постапката за приготвување е многу лесна. Сепак, за приготвување на тестото треба да одвоите малку повеќе време за разлика од крофните кои се прават само со прашок за печиво. Ова тесто содржи квасец и треба да ферментира, но затоа пак, на крај излегуваат совршено вкусни.
Една од важните работи кои морам да ја напоменам кога станува збор за приготвување на тестото, е дека просторијата во која ќе ги правите треба да биде топла, да нема провев, и секако, да ја погодите температурата за пржење. Еве што ви е потребно:
ПОТРЕБНИ СОСТОЈКИ: 300 мл млако млеко, 2 јајца, 1 кесичка сув квасец или половина коцка свеж (20 г), 3 супени лажици шеќер, 1 кесичка ванилин шеќер (10 г), 100 мл масло за готвење, 1 мала лажичка сол, 650-700 г брашно, 1.5 супена лажица рум, ситно рендана кора од 1 лимон, + масло за пржење, шеќер во прав за посипување и по желба џем или крем
ПОСТАПКА: загрејте 300 мл млеко да биде млако и сипете го во еден подлабок сад, но не целата количина. Додајте една кесичка сув квасец или изронете половина коцка свеж, една кесичка ванилин шеќер и три супени лажици обичен кристал/гранулиран шеќер. Промешајте со кујнска жица-маталка за да се растворат состојките. Оставете на топло место 10-тина минути за да се активира квасецот и да запени.
Во меѓувреме измерете го брашното и просејте го, па додајте му една лажичка сол. Во посебен сад изматете две јајца кои претходно отстојале на собна температура, па додајте им 100 мл масло или 100 г растопен и подизладен маргарин/путер, една ипол лажица рум, па соединете ги со маталката. Наместо рум можете да додадете pакија (крофните да не впиваат масло при пржењето). На крај додајте ситно рендана кора од лимон.
Мешавината од јајца додајте ја во активираниот квасец, а потоа и остатокот од млекото. Започнете постепено да го додавате брашното со непрекинато мешање. најдобро е брашното да се додава во неколку наврати, малку по малку, за да има време да ги впие влажните состојки. На почетокот мешајте со маталка, а потоа со дрвена лажица.
На крај треба да добиете меко и еластично тесто кое се тегне со лажицата и се одвојува од садот. Наросете го малку со брашно, покријте го со фолија/кеса и крпа, па оставете го да ферментира следните 40 минути или додека да го удвои волуменот. Стасаното тесто премесете го со лажица, со подигнување нагоре, како да се тегне. Наросете го пак со малку брашно и покријте го, па оставете го уште еднаш да ферментира.
Кога и по вторпат ќе го зголеми волуменот, истресете го врз набрашнета работна површина, малку наросете го со брашно и нежно премесете го како да го диплите, па обликувајте еден вид викна или ролат. Со оклагија развлечете го во кора со дебелина приближно 1 см (да не е ниту премногу тенко, но ниту многу дебело).
Потоа земете модла или чаша со остри ивици и натопувајте ја во брашно оа вадете ги крофните. Редете ги врз послужавник наросен со брашно или врз чиста крпа, па покријте ги одогора за да не се сушат. Оставете ги да одморат 20-тина минути за третата ферментација. За пржење користете широка тава или тенџере и сипете доста масло.
Кога ќе ги спуштате крофните тие не смеат да паѓаат на дното, туку мора да пливаат во маслото. Исто така многу е важно температурата да биде средно умерена. Кога сметате дека маслото е загреано, спуштете една трошка тесто и ако започне да пени, значи дека е добро. Но, ако многу брзо поцрне, значи дека маслото ви се прегреало.
Спуштајте ги крофните со маслото со горната страна (онаа страна на која лежеле, долната, сега треба да биде горе). Веднаш поклопете го тенџерето и пржете ги 1 минута, а потоа превртете ги и пржете ги приближно 1 минута, без капак. Штом заруменат и од другата страна, вадете ги со решеткава лажица врз чинија обложена со хартиена салфетка. Деталите од постапката погледнете ги ОВДЕ.
