За вкусови „не се дикутира“, но кога ќе ме прашаат кое слатко е најубаво, јас секогаш им велам дека нема поубаво од македонското слатко приготвено од смокви. Ги сакам и двете слатка од смокви и она од зелени и она од зрели плодови, секое на свој начин си е убаво, како друга димензија, но бидејќи доста е рано за второто слатко, сега ќе ви откријам два рецепти за приготвување на слатко од зелени смокви.




Секој домаќин или домаќинка си има свој рецепт и свој начин на приготвување, но слаткото по вкус е речиси идентично, а единствено може да се разликува во количината и додатоците кои се ставаат за вкус како што е лимон, ванила или листови од билката слаткарче.




Доколку имате испробан рецепт, можете да го споделите со читателите на НМД во групата НМД рецепти. За подготовка на ова слатко потребни се зелени смокви, кои кога ќе се скинат испуштаат млечно бела течност-млеко (а која пак, се користи за лекување на бpaдавици).




Токму поради него смоквите се вријат во 9 води, според некој во 6 води или само во 2-3 води со оставање да изладат после секое потопување во водата, по што секоја смоква поединечно се истискува за да излезе од нејзе млечот.

РЕЦЕПТ 1 – СЛАТКО ОД ЗЕЛЕНИ СМОКВИ. Потребни состојки: 1 кг и 250 г мали зелени (диви) смокви, 3 кг шеќер, 500 мл вода, 3 лимони и 1 ванилин шеќер

Постапка: смоквите добро измијте ги со ладна вода, па потоа исечете им ги петелките и со чепкалка или игла за плетење дупнете ги на двата краја. Вака приготвените смокви ставете ги во чисто тенџере, прекријте ги со ладна вода, па ставете ги на оган да зовријат.




Откако малку ќе извријат врелата вода фрлете ја, па додајте нова вода и постапката повторете ја 6-9 пати. Кога ќе се фрли последната вода, смоквите ставете ги да се цедат.

Шербет: шеќерот и водата ставете ги на оган додека да се растопи и почне да се вари. Шербетот не мора да биде густ за да можат смоквите да се варат во него. Слаткото се вари брзо на посилен оган при што се создава пена која треба да се собира.




Готово е кога на страна ќе ставите малку шербет да излади и кога ќе се подигне, треба да паѓа во густи капки од лажицата. Пет минути пред крајот од варењето додајте сок од три лимони и една ванила. Готовото слатко се трга од оган и се покрива со влажна крпа да отстои 10 минути.




Потоа се враќа назад на оган да зоврие повторно. Ова се прави затоа што смоквите додека отстојуваат покриени, испуштаат уште сок кој го впиле при варењето во водата, па на овој начин се спречува шербетот да се разреди. Кога уште малку ќе изврие, се трга пената и се остава да излади. Изладено се собира во стерилни тегли.

РЕЦЕПТ 2 – СЛАТКО ОД ЗЕЛЕНИ СМОКВИ. Потребни состојки: 1 кг зелени смокви, 2 литри вода, 2,2 кг шеќер, 2 ванилин шеќер, 2 лимони

Постапка: лимоните измијте ги, отceчете им ги петелките и засечете ги на горниот и долниот дел. Со игла боцнете ги на две места, па налијте ги со ладна вода и ставете да се варат 9 пати со менување на водата.




Може да се варат во две тенџериња паралелно, додека смоквите се варат во едно тенџере, во другото се зоврива вода, па после со решеткаста лажица само се префрлаат смоквите во другото тенџере. На овој начин се добива на време. Потоа смоквите процедете и оставете ги да се цедат додека го приготвувате шербетот.




Шербет: шеќерот ставете го во тенџере, налијте го со ладна вода и ставете на оган да се вари, не предолго за да не згусне многу. Ставете ги смоквите внатре за убаво да се сварат. На 5 минути пред крај додајте ги исечканите лимони на кругови и ванилиниот шеќер.

Готовото слатко тргнете го од оган и покријте го со влажна крпа да отстои 10 минути. Потоа повторно вратете го на оган да проврие за да испари сокот што го испуштиле смоквите со стоење. На овој начин никогаш нема да се расипе или зашеќери.




Повторно тргнете го од оган, отстранете ја пената и покријте го со влажна крпа. Нека отстои преку цела ноќ, а следниот ден ладното слатко собирајте го во тегли кои се чуваат на ладно место. Од оваа количина се добиваат 4 тегли од 400 грама.