Брз и сочен колач со ореви и чоколадо

За оние што имаат трпение – нека почекаат колачот да излади, а за нас останатите – ќе си го „скубнуваме“ така уште додека е врел, одличен е!

Потребни состојки:

2 јајца
250 г шеќер
1 ванилин шеќер
400 г брашно
1 прашок за печиво
260 мл млеко
110 мл масло
50 г мелени ореви

За прелив:

200 г шеќер
200 мл млеко
100 г чоколадо
125 г путер
100 г мелени ореви

Постапка:

Најпрво вклучете ја рерната да се загрее на 200 степени. Јајцата изматете ги, нема потреба да се одвојуваат белките и жолчките. Потоа додадете ги сите останати состојки и изматете ги добро да се соединат и да нема грутчиња.

Кога рерната ќе се загрее, во една помала тепсија намастена и набрашнета, излејте ја смесата и ставете да се пече. Намалете ја температурата на 180 степени околу 30 минути, во зависност од рерната.

Проверете со чепкалка дали е печено.

За прелив соединете ги шеќерот, млекото, путерот и сето заедно ставете на оган да се растопи. Пред да проврие додадете го чоколадото и тргнете да не загори, па мешајте за да се растопи и потоа додадете ги оревите.

Филот ќе биде редок, но така треба да биде. Прелијте го преку колачот, рамномерно насекаде и оставете да излади.

Јас преливав врело преку врело и излезе супер, а вие како сакате, може врело со ладно.

Loading...