Го заборавивме овој природен извор на калиум – а може да помогне кај хипертензија
Смоквата е едно од најстарите култивирани овошја во историјата на човештвото.
Се одгледувала уште во древна Месопотамија и Египет, а денес повторно го привлекува вниманието на нутриционистите и лекарите – особено кога станува збор за природно намалување на крвниот притисок и поддршка на целокупното здравје.
Иако често ја поврзуваме со традиционалната кујна и зимските десерти, сувите смокви се вистинска „нутритивна бомба“ – концентриран извор на витамини, минерали и диетални влакна.
Според нутритивните анализи, сувите смокви содржат витамин А, витамини од Б-комплексот (тиамин, ниацин, витамин Б6), витамин К, како и магнезиум, цинк, бакар и манган.
Нивниот гликемиски индекс изнесува околу 62, додека кај свежите смокви е понизок – околу 55.
Стручњаците посочуваат дека две до три суви смокви дневно, консумирани континуирано најмалку две недели, можат да придонесат за видливи подобрувања во дигестијата, крвниот притисок и нивото на холестерол.
Суви смокви и дигестивно здравје
Во 100 грама суви смокви има околу 12,9 грама диетални влакна. Токму поради тоа се препорачуваат кај лица со забавена перисталтика и запек.
Влакната ја поддржуваат работата на цревата и помагаат во одржување на здрава цревна флора.
Сепак, како и кај секоја храна богата со влакна, важно е умереноста – прекумерната консумација може да предизвика пролив или надуеност.
Поддршка на хормоналниот баланс
Сувите смокви содржат железо – минерал што организмот не може сам да го синтетизира. Железото е клучно за создавање на хемоглобин, но и за правилна функција на тироидната жлезда и хормоналниот систем.
Кај лица со недостаток на железо, редовната и балансирана консумација на намирници богати со овој минерал може да биде значаен дел од нутритивната стратегија.
Здрави коски и превенција од остеопороза
Благодарение на присуството на калциум, магнезиум, фосфор и цинк, сувите смокви придонесуваат за одржување на коскената густина.
Овие минерали имаат важна улога во превенција од кршливост на коските и развој на остеопороза, особено кај жени во постменопауза.
Поддршка на плодноста
Магнезиумот и цинкот се важни и за репродуктивното здравје. Нивниот недостаток може да влијае врз хормоналната стабилност и плодноста.
Поради тоа, на жени кои планираат бременост често им се препорачува урамнотежена исхрана богата со овие микроелементи.
Дополнително, магнезиумот придонесува за намалување на стресот – фактор што често има значајно влијание врз репродуктивното здравје.
Природна поддршка за намалување на крвниот притисок
Една од најзначајните придобивки на сувите смокви е нивната содржина на калиум. Калиумот помага во регулација на крвниот притисок преку балансирање на нивото на натриум во организмот.
Одредени истражувања укажуваат дека внесот на доволни количини калиум може да придонесе за подобра контрола на хипертензијата.
Сепак, лекарите потенцираат дека смоквите не се замена за терапија, туку можат да бидат дел од здрав начин на исхрана.
Намалување на холестеролот
Растворливите влакна од сувите смокви помагаат во намалување на нивото на „лош“ LDL холестерол.
Тие ја намалуваат повторната апсорпција на жолчните киселини во црниот дроб, што индиректно влијае врз синтезата на холестерол.
Поради тоа, неколку смокви можат да бидат практичен и хранлив избор за појадок или здрава ужина.
Кожа со повеќе сјај
Високата концентрација на антиоксиданси, витамини и минерали позитивно влијае врз здравјето на кожата.
Редовната консумација може да придонесе за подобар тонус и намалување на оксидативниот стрес – фактор поврзан со предвремено стареење.
Кој треба да биде внимателен?
Иако се исклучително хранливи, сувите смокви не се препорачуваат без консултација кај лица со дијабетес или кај оние што користат инсулинска терапија, поради нивната природна содржина на шеќери и повисок гликемиски индекс.
Како и секогаш, најбезбедниот пристап е индивидуализирана исхрана усогласена со совет од лекар или нутриционист, пишува НМД.
