Идеален рецепт за оброк набрзина. Брз и вкусен оброк кој сите го сакаат. Искористете го она што го имате во фрижидер, исечкајте, измешајте и испечете. Мафините се многу вкусни, меки, воздушести, а се подготвуваат од само неколку состојки. Слободно може да ја удвоите количината за повеќе мафини.
Ептен се брзи и лесни и секогаш кога немам време за да направам појадок или вечера ги подготвувам овие мафини. Одлично одат и како закуска со кафе, а домашните повеќе ги сакаат солени отколку благи.
Може да додадете и сувомеснато месо во нив, јас ги правам со зеленчук и кашкавал и имаат неверојатен вкус. Се подготвуваат без капка масло. Единствено користам малку масло за премачкување на калапите да не се залепи смесата. Еве што ви е потребно:
ПОТРЕБНИ СОСТОЈКИ (ПРВ РЕЦЕПТ): 2 чаши брашно, 1 чаша јогурт, ½ чаша масло, 3 јајца, 1 прашок за печиво, 1 лажичка сол, 200 г фета сирење, шунка или сланина по желба и црвена пиперка или ајвар – по желба.
ПОТРЕБНИ СОСТОЈКИ (ВТОР РЕЦЕПТ): 2 јајца, половина кесичка прашок за печиво, една црвена пиперка со средна големина, една тиквица, 250 г кашкавал, 125 г брашно и сол и црн пипер по вкус.
ПОСТАПКА ЗА ПРВИОТ РЕЦЕПТ: Јајцата изматете ги со масло и со јогурт. Можете да користите маталка, а можете да ги изматите и со виљушка. Додајте сол и просеано брашно, прашок за печиво, па смесата изматете ја за да се изедначи.
Сирењето издробете го, додајте го во тестото и промешајте. Шунката исечкајте ја на ситни коцкички, а може да додадете сланина или нешто друго по ваш избор. Добар вкус и мирис дава ситно исечкана црвена пиперка, на пример.
За да добиете портокалова боја, во тестото можете да ставите и некоја лажица ајвар. Полнете ги намастените калапи или корпички за мафини но не ги преполнувајте до врв, затоа што ќе пораснат при печењето. Печете ги во загреана рерна на 200 степени 20 минути. / Coolinarika.com
ПОСТАПКА ЗА ВТОРИОТ РЕЦЕПТ: Во стаклен сад скршете ги јајцата и додајте сол и црн пипер по вкус. Јас додавам половина кафена лажичка сол и нешто помалку црн пипер, што е сосем доволно. Со жица за матење измешајте ги состојките, а потоа настрана изрендајте ја тиквицата на покрупно.
Ренданата тиквица се става во смесата со јајца и малку се промешува. Пиперката исечете ја на ситни делови и додадете ја во смесата. Исто се ренда и кашкавалот, 250 г или некое цврсто сирење доколку во моментот немате кашкавал. Ренданиот кашкавал се става во смесата и повторно се промешува.
Во приготвената мешавина започнете да го додавате брашното. Најпрво додадете половина од потребната количина и добро измешајте. Кога ќе се соединат сите состојки, додадете ја и другата половина. Соединете ги сите состојки и на крајот додадете половина ќесичка прашок за печиво.
Целата смеса изедначете ја. Во меѓувреме загрејте ја рерната на 200 степени. Овие мафини се печат за многу кратко време. Во калапите каде што ќе ги печете мафините, намастете ги модлите и наросете ги со малку брашно на дното и на страните.
Потоа со супена лажица додајте од смесата во модлите. Мафините се печат 30 минути на 200 степени. Во зависност од рерната може да се печат и 20 минути, значи потребно е да добијат убава румена боја и да се подигнат.
