Фотографија и рецепт на Ноне.
Оваа погача ја имам направено повеќепати во долгнавест облик и од обично тесто, а вчера ја направив во облик на венец и од лиснато тесто. Јас сум воодушевена и од вкусот и од изгледот. Пробајте ја, нема да се покаете.
Потребни состојки: 750-800 г брашно, 30 г свеж квасец, 1 јајце, 10 лажици масло, 1 лажичка шеќер, 2 лажички сол, 250 мл млако млеко и 200 мл млака вода
За фил: 400-500 г исчистен спанаќ, 250 г ситно сирење, 1 белка и сол по вкус, 1 жолчка за премачкување и сусам за наросување и 125 г за премачкување
Постапка: Од наведените состојки се замесува мазно тесто. Се покрива со крпа и се остава да одмора околу 20-30 минути. Стасаното тесто се префрла на набрашнета работна површина и со помош на оклагија се формира кора, се премачкува со омекнат маргарин, а потоа се сече кората во круг на неколку места како зраци.
Се преклопуваат сечените делови кон средината и секој дел се премачкува со маргарин. Се остава во фрижидер да излади околу 10-тина минути.
За фил: Се обарува исчистениот спанаќ, а потоа се процедува и ситно се сечка. Се притиснува со раце за да остане што помалку течност во него. Во еден сад се става ситното сирење, па се додава спанаќот, сол по вкус и една белка. Се промешува.
Тестото го враќаме на набрашнета површина и формираме правоаголна кора со должина од 70 см. Тенко ја премачкуваме со омекнат маргарин, а потоа рамномерно го нанесуваме филот. Кората ја виткаме како ролат и нежно ја притискаме со рацете.
Калап за печење бр.28 го премачкуваме со маргарин, па формираниот ролат го ставаме во круг, ги соединуваме краевите и формираме венец. Се покрива со крпа и се остава да стасува и да се удвои околу половина час.
Жолчката се мати со малку млеко и масло, па со четка се премачкува венецот. Со ножици се засекува на растојание од околу 4 см и длабочина 1,5 см. Се наросува со сусам и се остава уште 10 минути.
Потоа се пече во загреана рерна на 200 степени околу 35-40 минути, а ако е потребно и повеќе (погачата треба да биде добро печена на дното од калапот).
Печивата со фил се печат малку подолго од вообичаено и не треба да стојат после печењето долго во калапот. После 5 минути извадете го венецот на хартија за да не се создаде пареа (влажност). Топлата погача се премачкува со коцка путер и се остава да се лади.
Се послужува со јогурт, кисело млеко, но може и без ништо, зошто многу е вкусна и сама по себе.
