Потребни состојки: 500 г кори (во моето пакување имаше 15 листови), 700 г ореви, 200 г бадеми, 5 лажици презла, 2 кесички ванилин шеќер, 200 г путер, 100 мл масло. За шербет: 900 г шеќер, 100 мл мед, 1 литар вода, 2 ванилин шеќер, 1 лимон

Постапка: најпрво се вари шербетот. Во тенџере на оган се става 900 г шеќер, 100 мл мед, 1 литар вода, 2 кесички ванилин шеќер и 1 лимон исечен на тркалца. Откако ќе зоврие варете го сирупот уште 10-тина минути, па исклучете ја ринглата и оставете да се олади.

На страна растопете 200 г путер на умерена температура. Кога ќе се растопи тргнете му ја пената и процедете го низ цедалка. Додајте му 100 мл масло. Правоаголен поголем плех добро намастете го. Во процесор сомелете на покрупно 700 г ореви и 200 г бадеми.

Во смесата додајте и 5 лажици презла и 2 кесички ванила. Добро промешајте за да се изедначи смесата. Вкупно ќе ви бидат потребни и 15 листови кори за баклава, односно 500 г. На дното од плехот наредете 4 кори, а секоја намастете ја со помош на силиконска четка.

Врз петтата кора ставете фил, па следните 6 кори редете ги една врз друга, секоја премачкувајќи ја малку со мешавината од путер и масло и рамномерно распоредувајќи од филот. На врвот се завршува со три кори, секоја намастена, а одозгора малку се притиснува со дланките.

Се сече и целата се прелива со остатокот од путерот. Одозгора се покрива се една цела кора. Се става да се пече во претходно загреана рерна на 220 степени 1о минути, па се намалува на 180 степени и се пече 30 минути, па се трга горната кора и се пече уште 10 минути така отскриена.

Врелата баклава се прелива со ладен шербет. Веднаш ќе го впие шербетот. Оставете да се олади, па послужете. Рецепт и фотографии на Јасна Мутиловиќ.

Права традиционална баклава со многу ореви и шеќер – сите беа воодушевени

Детално објаснет рецепт за традиционалната баклава – омилената слатка на Балканот. Освен состојките и редењето, особено е важно печењето, како и полевањето, а во овој рецепт и поклопувањето.

Потребни состојки: 1 кг готови кори за баклава, 900 г мелени ореви, 100 г крупно мелени ореви (исечкани со нож), 150 г шеќер. За премачкување: 250 г путер, 100 мл масло. За шербет: 1 кг шеќер, вода нешто повеќе од 1 литар, 1 лимон

Постапка: исечкајте ги корите според димензиите на плехот. Растопете го путерот и измешајте го со маслото. Во тенџере ставете го шеќерот за шербет и прелијте го со вода, 2 прста над шеќерот. Оставете да се вари 15-20 минути.

Густината треба да биде нешто како сируп-сок на растворање, да не е прегусто. Шербетот мора да биде убаво изладен кога ќе се прелива врелата баклава. По желба, пред крајот на готвењето, во шербетот може да додадете сок од еден лимон.

Редење на баклавата: намастете плех 35х25 см, па наредете 3 кори една преку друга, секоја премачкана со растопениот путер (треба да биде топол). Потоа рамномерно распоредете ги 100 г сечкани ореви и наросете малку шеќер.

Потоа наредете две кори, исто така премачкани со путер, и наросете мелени ореви (претходно помешани со 150 г шеќер). Продолжете ја постапката до крај, односно на секои две кори се ставаат мелени ореви. Внимавајте да ги распоредите состојките за да имате рамномерно од нив до крајот.

За завршеток оставете три кори кои исто така ќе ги премачкате со топол путер, освен последната. Пред сечење треба убаво со дланките да се притисне одозгора за да се порамни. На крај исечете со остар нож на ромбови.

Ставете прво да се пече на силен оган (кај мене е 190 со врел воздух) 10 минути за да добие убава светлокафеава боја, а потоа намалете на 150 степени и печете уште 45 минути. Внимавајте премногу да не ви потемне (се пече приближно 1 час).

Топлата баклава се прелива со ладниот шербет и се притиснува со друг плех одозгора за да се извиткаат корите нагоре. Баклавата не смее да биде притиснета повеќе од 15 минути бидејќи ќе ја промени бојата. Се остава да преноќи на ладно место. / Coolinarika.com