Убаво се приготвува и со покрупно мелен рогач, но од искуство ви велам дека најубаво излегува кога е фино мелен.
Потребни состојки: 4 јајца, ½ шолја шеќер (100 г), ½ шолја млеко (100 мл), ½ шолја масло (100 мл), 1 шолја брашно (130 г), 2/3 шолја мелен рогач (100 г) – просејте го да нема грутчиња, 2 ванилин шеќер, 1 прашок за печиво и 3 големи јаболка
За глазура (кој сака може да стави, но не мора) 150 г чоколадо за готвење и 6 лажици масло
Постапка: Вклучете ја рерната на 180 степени. Изматете ги јајцата со шеќерот и ванилин шеќерот. Додадете млеко, масло, брашно, прашок за печиво и рогач, па изматете со миксер.
![сочен колач со јаболко](https://nmd.mk/wp-content/uploads/2019/05/IMG_6900.jpg)
Изрендајте (не ги сечкајте, ИЗРЕНДАЈТЕ ги, зошто нема да биде така сочен колачот) во смесата 3 јаболка. Измешајте ја смесата со лажица и излејте ја во тепсија со димензии 20х30 см.
![](https://nmd.mk/wp-content/uploads/2019/05/IMG_6901.jpg)
Јас имам тепсија што не лепи, па не ја мачкам со ништо. Доколку би ја немала, би печела во тепсија обложена со хартија.
Се пече 30 минути на 180 степени.
![сочен колач со јаболко](https://nmd.mk/wp-content/uploads/2019/05/IMG_6902.jpg)
Врз изладениот колач може да се прелие чоколадна глазура. На пареа се растопува чоколадото за готвење и се додава 6 лажици масло. Кога малку ќе излади се прелива врз колачот.