Пробајте ги вкусните пинерлии со урда и спанаќ на нашата драга членка Данче Стојева

Рецептот беше објавен во нашата и ваша група НМД-рецепти.

Фото и рецепт: Даница Данче Стојева

Потребни состојки:

Loading...

500 мл млеко
10 супени лажици масло
околу 900 – 1000 г брашно или по потреба
1 супена лажица сол
2 супени лажици шеќер
1 квасец
250 г путер или маргарин
300 г ситно сирење
1 јајце за премачкување

За фил:

500 г спанаќ измиен и ситно исечкан
500 г урда

Постапка:

Квасецот растворете го млако млеко со една лажица шеќер и малку брашно, па откако ќе се активира, заедно со другите состојки замесете средно меко тесто кое не лепи на раце (Брашното постепено додавајте го).

Тестото оставете го да одмори 30-тина минути, па поделете го на 6 делови. И шесте топчиња оставете ги 10 минути да одморат.

Исто така и коцката путер поделете на 6 делови. Од секое топче развлечете кора, премачкајте ја рамномерно со путерот, на еден крај ставете од филот и свиткајте како ролат.

За фил: Ситно исечкајте го измиениот спанаќ и измешајте го со урдата. Потоа поделете го на 6 дела.

Ролатот пресечете го на 5 или повеќе парчиња. Постапката е иста и за преостанатите делови тесто.

Наредете ги во плех обложен со хартија, одозгора премачкајте ги со јајце, наросете ги со сусам и после 20 минути стасување, ставете ги да се печат во загреана рерна околу 25 – 30 минути на 180 степени (прво на 200 околу 10 минути, па се намалува на 180 и се печат до крај).

Како фил можете да ставите сирење, спанаќ, кашкавал и шунка или нешто друго по ваш избор.

Фото и рецепт: Даница Данче Стојева

Loading...