Ова се најубавите крофни без млеко и јајца и воопшто не се разликуваат од мрсните. Воздушести се, меки, се топат во уста, а од нив мириса целата улица. Особена арома му дава ренданата кора од лимон и портокал, како и ванилиниот шеќер.
За сите оние што постат овој период, можете да се засладите со овие прекрасни посни крофни. Рецепт и фото на Хрисула Лазевска.
Потребни состојки:
1 кг брашно
40 г квасец
300 мл млака вода
200 мл кисела вода
100 мл масло
2 лажици шеќер
2 кесички ванилин шеќер
Рендана кора од портокал – многу малку
Рендана кора од лимон
1 лажичка сол
Постапка:
Во подлабок сад ставете го квасецот, лажица шеќер и лажица брашно. Добро промешајте со малку вода и оставете квасецот да се активира.
Потоа, во надојдениот квасец додадете масло, вода, кисела вода, шеќер, рендана кора од лимон и портокал, ванилин шеќер. Замесете со брашно. Брашното додавајте го малку по малку и додадете сол. Завршете со мешање и оставете тестото да се удвои.
Тестото развлечете го на побрашнета работна површина, вадете тркалца со чаша и оставете малку да надојдат, околу 10-тина минути.
Маслото загрејте го и горната страна на крофната спуштете ја свртена кон долу. Поклопете и пржете околу една минута, тргнете го капакот и оставете долната страна уште малку да зарумени.
Крофничките вадете ги на салветка да се исцедат, наросете со шеќер во прав и послужете со џем. Уживајте во најдобрите крофни!
