Кашлицата е спазматична контракција на мускулите, која го ослободува телото од акумулираната слуз во бронхиите. Големата ефикасност на жалфијата се должи на драгоцените есенцијални масла содржани во нејзините листови кои имаат антибактериско и антиинфламаторно дејство.

Жалфијата е природен лек за многу болести, а може да биде од голема помош и во зајакнување на имунитетот. Потекнува од семејството на усноцветни растенија. Од неколку причини, ова растение се смета за спасител.

Жалфијата е диво растение, затоа често се нарекува и ливадски мудрец. Има овални кадифени ливчиња покриени со густи влакна од двете страни. Најчесто расте во карпести области, а нејзиниот животен век е до седум години. Жалфијата е чувствителна на мраз и студ.

Ако одлучите да засадите жалфија во вашиот дом, потребно е да и обезбедите доволно топлина, а најидеално време за засадување е април или мај. Не е премногу чувствителна на видот на почвата – може да се сади во тегли, но и на отворен простор. За лековити цели се берат лисјата и цвеќињата, а најдобро е да се бере за време на сончевите денови, кога се создаваат повеќе есенцијални масла во растението.

Исто така, жалфијата содржи фосфорна киселина, витамини Ц, Б1, П и танини. Народната медицина препорачува комбинација од сува жалфија и млеко за смирување на сувата кашлица.

Се верува дека овој напиток ја ублажува кашлицата, ја разредува слузта, го стимулира нејзиното исфрлање и го олеснува искашлувањето. Има антисептично и антиинфламаторно дејство и придонесува за побрзо закрепнување.

Жалфијата (Salvia officinalis) потекнува од зборот ”salvare”, што значи да се спаси, да се лекува, бидејќи античките Римјани многу го користеле ова билно растение при лекување на разни болести, а „officinalis“ значи и заздравување. Жалфијата ја користеле за стимулирање на концентрацијата, подобрување на меморијата и се смета дека придонесува за долговечност.

Пред откривањето на антибиотиците, чајот од жалфија се користел за воспаление на грлото, засипнатост, воспаление на внатрешните органи, за плакнење на ва-ги-на-та, за туберкулозно потење и габични инфекции.

Во медицинска смисла, жалфијата претставува антибиотско растение со широк спектар. Се користи и за регулирање на потењето, за топлотни бранови кои настануваат за време на менопауза, за нередовна менструација и обилно кр-вавење, за зајакнување на нервите, за прочистување на црниот дроб и лекување на ревматизам.

Листовите од жалфија се користеле за чистење на забите и непцата, а денес екстрактот од жалфија често се додава во пастите за заби. Исто така, жалфијата се користи како зачин при готвење. Таа влијае на процесите за варење на храната и лачењето на жолчна киселина.

Се користи за намалување на лачењето на плунка кај Паркинсонова болест. Мајките што дојат и сакаат да престанат да дојат, се верува дека доколку користат жалфија ќе го забават производството на млеко.

Жалфијата се користи и за релаксација, нервоза, напнатост и вртоглавица. Исто така се користи против хроничниот замор, нервна исцрпеност, ослабен имунитет, слаба меморија и концентрација. Жалфијата е помеѓу главните состојки во кремите против разни кожни инфекции и шампони против првут.

Како што претходно споменавме, има антисептично дејство, па затоа се користи за правење на гаргара, испирање на воспаленото грло грлото и за побрзо зараснување на рани или лузни. Жалфијата има антимикробно и спазмолитично дејство (ги релаксира мазните мускули), го намалува лачењето на пот и плунка, а исто така го регулира потењето.

Жалфијата е природен конзерванс, бидејќи има антимикробен ефект. Благодарение на нејзината способност да спречи развој на вирусите, се користи во многу мевлеми против херпес. Исто така се користи за надворешно запирање на рани што кр-вават, но и за дезинфекција на чиреви.

Бидејќи има спазмолитично дејство, се користи и како чај за инхалација кај астма, бронхитис, но и кај други респираторни инфекции. Покрај тоа, жалфијата ќе ви помогне да се ослободите од лошиот и непријатен здив, благодарение на есенцијалните масла содржани во неа. Ова може да се постигне со правење гаргара или џвакање на сурови лисја од жалфија.

Одлична е и за настинки, чистење на синусите и намалување на болката при инфекции на ушите. За жените, жалфијата има многу позитивни ефекти. Покрај тоа што помага да се намали болката за време на менструацијата, таа исто така ја стимулира работата на матката и се регулираат циклусите.

Жалфијата за лице може да се користи за проблеми со акни и митесери, така што може да се користи како состојка за правење разни домашни маски за лице. Ефикасна е во нега на масната кожа, а во исто време е многу благотворна за негување на лицето бидејќи не предизвикува никакви несакани ефекти. Ја чисти лимфата и ја прави кожата поубава и витална.

Млеко со жалфија против тешка и хронична кашлица

Потребни состојки: 250 мл млеко, 1 лажица сува жалфија, 1 мала лажичка путер, 1 лажичка мед, 1/3 лажичка куркума.

Постапка: Во тенџере ставете 250 мл млеко на тивок оган, а потоа додајте 1 лажица жалфија и почекајте млекото да зоврие. Штом млекото зоврие, веднаш тргнете го тенџерето од шпоретот. Додајте 1 лажичка путер и промешајте додека да се растопи путерот. Поклопете го со капак тенџерето и оставете да отстои 15 минути.

По изминатото време, процедете ја течноста и додајте 1 лажичка мед и 1/3 лажичка куркума (за деца – 1/4 лажиче), и промешајте повторно. Напитокот треба да се испие половина час пред спиење. Загарантирана ви е тивка ноќ без тешка кашлица.

Овој брз и лесен напиток може да го подготвувате неколку дена додека да почувствувате олеснување и додека да ја исфрлите насобраната слуз од белите дробови. Рецептот може да го користат и деца и возрасни.

Но, и покрај фактот дека овој рецепт е многу ефикасен за проблеми со кашлица, самите лекари сугерираат дека жалфијата има одличен експекторанс ефект, но треба да се следат одредени медицински препораки.

На пример, овој пијалак може да ја намали лактацијата, па затоа не се препорачува за жени кои дојат. Исто така, треба да бидат претпазливи оние кои се склони кон бубрежни заболувања и хипотензија.

Прочитајте ги и следниве рецепти со жалфија: Рецепти со жалфија – чај, одвар, тинктура и маска за лице

Може да се направат разни лековити напивки од жалфијата. Прочитајте го рецептот за лековитиот чај, тинктура, одвар и домашна маска за лице приготвени со жалфија.

Чај од жалфија

Овој чај се подготвува многу едноставно, речиси како и сите други чаеви. Ставете една лажичка сува жалфија во 250 мл врела, зовриена вода, и оставете ја да се готви околу три минути. Потоа тргнете од оган, поклопете и оставете да отстои 10 минути.

Процедете го чајот и консумирајте три чаши на ден, во зависност од тоа за какво заболување го користите. Важно е да го пиете чајот во голтки, така што вашето тело всушност полека ќе ги апсорбира сите лековити својства.

Чајот може да се користи за болки во грлото и како помош при кашлање, но и при сите проблеми со забите. Ако се користи за лекување на лош здив или гингивитис, потребно е да се прави гаргара со чај во устата, а потоа да се исплука. Доколку чајот го користите за болки во грлото, засладете го со мед и многу брзо ќе почувствувате олеснување.

Одвар од жалфија

Одварот се подготвува слично како чајот, но се пие малку поинаку за проблеми со желудникот и другите органи за варење. Прелијте лажица сув лист од жалфија со чаша врела вода и оставете поклопено да отстои половина час.

Пијте додека е топло веднаш по процедувањето на чајот (ако е изладен малку загрејте го). За проблеми со варењето на храната, најдобро би било да пиете половина чаша чај половина час пред оброк. Овој лек може да се користи и за гаргара и за плакнење на усната шуплина.

Тинктура од жалфија

За да подготвите домашна тинктура од жалфија, ќе ви треба домашна ракија или и 20 г сечкани листови од жалфија. Ставете ги листовите жалфија во стаклена тегла или шише и прелијте ги со алкохол.

Оставете ја теглата да отстои на топло и темно место околу еден месец. Потоа процедете и складирајте ја течноста во темно шише со капаче. Користете го со ставање до 15 капки во вода или чај и на тој начин исплакнете или правете гаргара на усната шуплина. Тинктурата од жалфија е одлична за речиси сите здравствени проблеми. Не се препорачува за деца и бремени жени.

Пилинг за лице од жалфија

Жалфијата е одлична за детоксикација на кожата, па може да се користи за правење маски и пилинг за лице во домашни услови. Овој рецепт исто така ќе помогне да се решите од нечистотиите на лицето и да се намали можноста од појава на акни и митесери.

Потребни состојки: 200 мл вода, 3 лажици овесни снегулки, 3 лажици ситно мелени бадеми,1 лажица суви лисја од жалфија.

Подготовка: Прелијте ги листовите жалфија со топла, зовриена вода и процедете по десет минути. Додајте ги овесните снегулки и мелените бадеми и промешајте додека да добиете погуста смеса. Ставете ја смесата на лицето и лесно тријте по кожата. По неколку минути исплакнете со вода. Текстот за НМД.мк го напиша Мартина Христовска