Рецепт за меки и вкусни матени кифли без месење
Овој рецепт за матени кифли е совршен избор за секој што сака брзо и лесно да подготви меки, мирисни и неодоливи кифли без напорно месење на тестото.
Со помош на миксер, целиот процес е едноставен, а резултатот се неверојатно меки кифли што ќе ги воодушеват сите на трпезата.
Идеални се за појадок, вечера или за послужување на гости, пишува НМД. Еве што ви е потребно:
Потребни состојки:
– 300 мл млако млеко
– 7 г сув квасец (или 1 супена лажица)
– 1 супена лажица шеќер
– 500 г брашно
– 1 лажичка сол
– 150 мл масло
– 1 белка
– 1 лажичка оцет
– 1 жолчка (за премачкување)
– 1 лажичка млеко (за премачкување)
– сусам (по желба, за посипување)
– НМД
Постапка:
1. Во сад загрејте го млекото да биде млако, па додајте го сувиот квасец и шеќерот. Промешајте и оставете ја смесата да отстои 2-3 минути за квасецот малку да се активира.
2. Во друг сад измешајте го брашното со солта. Направете мало вдлабнување во средината и истурете ја смесата со квасецот. Додајте го маслото, белката и оцетот.
3. Со миксер опремен со наставки за месење, измешајте ги сите состојки додека да се формира меко и малку лепливо тесто. Не е потребно рачно месење.
4. Премачкајте го тестото со малку масло одозгора и нежно притиснете го со рака за да се премачка рамномерно.
Покријте го садот со најлонска фолија и оставете го тестото да отстои на топло место околу 30 минути или додека да се удвои во обем. Доколку немате топло место, можете да ја загреете рерната на 30-40 °C и да го ставите тестото внатре.
5. Откако тестото ќе нарасне, посипете ја работната површина со малку брашно и извадете го тестото. Нежно префатете го и поделете го на два дела.
6. Едниот дел покријте го со фолија, а другиот развлечете го со оклагија во тенка кора. Исечете го на триаголници со секач за пица или нож. По желба, наполнете ги кифлите со фил (на пример, сирење) или оставете ги празни.
7. Секој триаголник свиткајте го во форма на кифла, почнувајќи од поширокиот дел кон врвот. Наредете ги кифлите во плех обложен со хартија за печење, покријте ги со кујнска крпа и оставете ги да отстојат уште 30 минути.
8. Загрејте ја рерната на 180 °C. Во меѓувреме, измешајте ја жолчката со лажичка млеко и премачкајте ги кифлите. По желба, посипете ги со сусам.
9. Печете ги кифлите во загреана рерна 20-25 минути или додека не добијат убава златна боја. По печењето, покријте ги со памучна крпа и оставете ги малку да се изладат.
10. Послужете ги топли или ладни. Овие кифли се неверојатно меки и вкусни, совршени за секоја прилика!
Уживајте во овие лесни и вкусни кифли и споделете го рецептот со вашите пријатели! Постапката погледнете ја во видео прилогот ОВДЕ:
