Навистина не знам зошто така се викаат кога се исти како и класичните кроасани – можеби затоа што постапката е многу пократка а ефектот е ист.

Се прават за многу пократко време од класичните, бидејќи за нив тестото го делам на 16 топчиња за да ми бидат кроасаните полиснати и повкусни, а за ова постапката е многу поедноставна и полесна, па мислам дека следниот пат ќе ги направам две дози.

Фантастично се меки и крцкави, а се разлистуваат како тестото да сте го диплеле 800 пати!

Потребни состојки:

40 г свеж квасец

400 мл млеко

1 лажица шеќер

1 лажица сол

50 мл масло + 1 лажица

500 г остро брашно

100-200 г меко брашно

200 г путер

1 јајце

Семки или морка сол

По желба нешто за полнење

Постапка:

Путерот ставете го во замрзнувач. Загрејте го млекото да биде топло па додадете го издробениот квасец, шеќер и една лажица брашно. Измешајте па оставете да се активира.

Кога квасецот ќе нарасне додадете 500 г остро брашно и добро со лажица измешајте. Смесата ќе биде доста цврста. Долејте 50 мл масло и додадете сол па повторно убаво измешајте.

Додадете уште малку меко брашно па со раце добро измесете го. Потребно е малку брашно, околу една рака, па ако тестото многу не се лепи на раце, доволно е. Во спротивно додадете уште малку и повторно измесете.

Прелијте со лажица масло, премесете, обликувајте топка, прекријте со крпа и оставете 45 минути на топло место за да нарасне.

Кога тестото ќе се удвои извадете го и премесете го, па развлечете го во правоаголник.

Дебелината на тестото нека биде околу 5 мм а тестото развлечете го во кора со димензии 60х40 см одокативно.

Изрендајте цел путер врз целата површина, па свиткајте во ролат. Пресечете го на 4 еднакви делови и оставете 15-20 минути покриено со крпа, за да не се суши додека кисне.

Земете го првото парче, наросете со брашно па развлечете правоаголник, па потоа исечете го цик-цак во тријаголници. На почетокот од секој тријаголник ставете фил и свиткајте кифличка.

Кифлите редете ги во плех, премачкајте ги одозгора со изматено јајце и наросете со семки по ваш избор (може и не мора).

Оставете ги во плехот да одморат 20 монути, па дури потоа вклучете ја рерната да се загрее на 220 степени. Печете додека да заруменат или околу 15-20 минути, во зависност од рерната.

Можете да ги послужите топли.

Ова е рецепт од Сашината кујна за кое има видео рецепт:

¼ квасец

1 лажица шеќер

2 лажици брашно

200 мл млака вода

Се меша и остава покриено 10 минути за да се активира квасецот.

Потоа се додава 350 г брашно

1 лажиче сол

4 лажици масло

Убаво со лажица се замесува, а потоа се доработува со рака додека да добиете убаво мазно тесто кое не лепи на раце. Покријте го тестото и оставете го да кисне половина час. Размесете го па додадете 50 г омекнат путер.

Убаво премачкајте го, завиткајте го со проѕирна фолија и оставете го најмалку два часа во фрижидер, а може и преку ноќ. Може дури да стои и два дена, пред да одлучите да ги правите кроасаните.

Тестото со раце развлечете го во правоаголна кора, исечете го од крај до крај цик-цак во тријаголници, а потоа секојтријаголник виткајте го во кроасан.

Наредете ги во плех обложен со хартија, премачкајте ги со јајце и оставете ги да киснат 45 минути. Потоа печете ги на 200 степени околу 15 минути.

Постапката погледнете ја во видеото: