Сите ги обожаваат тортите и колачите кои се подготвуваат со бисквити поради тоа што се највкусни. Имаат кремаст вкус, а кога бисквитите ќе омекнат во кремот кој може да биде со чоколадо или ванила, се добива фантазија од вкус. Мене омилен колач ми е овој, кој се подготвува од кршени бисквити. Рецептот го имам уште одамна, од мојата баба, а таа го има напишано во еден од тефтерите со рецепти кои ми ги подари.




Името на колачот не можам да го прочитам затоа што тефтерот е многу стар и листот е малку оштетен, но за среќа рецептот убаво се чита. Овој колач не се пече и не се користи брашно и јајца за да се направи. Потребни ви се само неколку состојки кои треба да ги измешате и колачот е готов. Еве што ви е потребно:




ПОТРЕБНИ СОСТОЈКИ (ПРВ РЕЦЕПТ): 470 г бели петит бисквити, 100 г сечкани ореви, 250 мл млеко, 120 г шеќер, 5 лажици чоколадо во прав (или какао), 120 г путер. ЗА ГЛАЗУРАТА: 150 г темно чоколадо.




ПОТРЕБНИ СОСТОЈКИ (ВТОР РЕЦЕПТ): 500 г турски чоколадни бисквити, 2 пудинзи од ванила, 2 пудинзи од чоколадо, 1 литар млеко и шеќер по вкус или според упатството на кесичките од пудинзите.

ВТОР РЕЦЕПТ




ПОСТАПКА ЗА ПРВИОТ РЕЦЕПТ: Во еден подлабок сад искршете ги бисквитите на помали парчиња. Оревите исечкајте ги на средни парчиња, па додајте ги во скршените бисквити. Млекото и шеќерот ставете да зовријат во тенџере на рингла, со повремено мешање. Кога шеќерот ќе се растопи, а млекото ќе се загрее додајте го чоколадото во прав или какаото и измешајте.




Тргнете го тенџерето од рингла, па додајте го путерот и енергично измешајте додека да се растопи. Смесата прелијте ја врз бисквитите и оревите и соединете со шпатула, додека бисквитите да почнат да омекнуваат и да се формира смеса со конзистентност како кал. Вака подготвената смеса излејте ја во калап, обложен со пластична фолија со димензии 10х30 см.




Измазнете ја смесата, покријте со фолијата одозгора и ставете го колачот во фрижидер да се стегне околу 1 час. По изминатото време, превртете го на рамна чинија и растопете го чоколадото за глазура, па прелијте преку колачот. Кога чоколадото малку ќе се стегне, декорирајте на средина од колачот со сечкани јатки.




ПОСТАПКА ЗА ВТОРИОТ РЕЦЕПТ: Еден потесен плех обложете го фолија. Сварете ги пудинзите посебно според упатството (по 2 пудинзи за половина литар млеко). На секој бисквит мачкајте прво пудинг од ванила, па редете покрај ѕидот на плехот по должина.




Потоа, преку него редете бисквити намачкани со пудинг од чоколадо и сè така по ред додека да се исполни калапот. Можете да ги редите и по сопствена избор и идеја. Оставете го во фрижидер добро да излади, па потоа превртете го на долгнавеста чинија за сервирање.




Глазура ставете по желба (може чоколадна или да ставите шлаг). Јас се одлучив за шлаг. Сечете го колачот добро изладен. Има одличен кремаст, чоколаден вкус. Напомена: Доколку користите „турски“ бисквити нема потреба од нивно претходно натопување во течност (чај, млеко) бидејќи овие бисквити се многу меки и веднаш ќе ја впијат влажноста од пудингот. / Coolinarika.com. Деталите од целата постапка за првиот рецепт може да ги погледнете во видеото ОВДЕ.