Кристина од Србија подолго време имала проблем со вишокот килограми. Користела многу диети, но резултатите секогаш биле разочарувачки. По неколку месеци истражување таа направила своја диета која и помогнала да ослабе 20 кг за 2 месеци.
Со оваа диета, приспособена за нејзините дневни потреби за храна – никогаш не гладувала, а вели дека диетата од 1.200 калории дневно ја препородила. ”Искуството што следува во текстот подолу е диета која јас ја избрав и се покажа ефикасна врз мојот организам.
Сите ние сме различни, најпрво има влијание колку сме подготвени да вложиме во нас, а потоа резултатите зависат и од многу други фактори како различниот метаболизам, различната храна која ни одговара итн…
Сакам да кажам дека оваа диета позитивно влијаеше во губењето на моите килограми, затоа треба секој да си го прилагоди својот начин на исхрана според неговите потреби и така резултатите за секого поединечно ќе бидат видливи за краток период.” – советува Кристина.
”Пред вас е диетата со која изгубив 20 кг за 2 месеци. Тоа е диета каде што се трошат околу 1.200 калории дневно со некои промени што ги патентирав, а тоа е да се трошат нешто помалку калории на шестиот ден, но на седмиот ден можете малку да се опуштите, да јадете повеќе и да внесете повеќе калории.
Менито се состои од нискокалорична храна богата со растителни диететски влакна која ќе ви овозможи да останете сити подолго време. Јас не гладував на оваа диета и не елиминирав ниту една група намирници и со умерена физичка активност, успеав да симнам 20 кг за 2 месеци.
Претходно бев 105 кг, а сега сум 85 кг. Диетата сè уште е во процес и во наредните месеци се надевам дека ќе го симнам истиот број на килограми кој што го симнав досега. Ова се досегашните резултати.”
Но, пред самата диета, прочитајте за основните принципи на исхрана за да ви помогнеме подобро да разберете како „функционира“ оваа диета, природата на дебелината и како да го изгубите вишокот тежина.
Се разбира, за да направиме каква било активност или едноставно за да живееме, потребна ни е храна. Храната содржи корисни хранливи материи кои не одржуваат во живот и ни даваат енергија. Овие хранливи материи можат да се поделат во пет основни групи: протеини, масти, јаглехидрати, витамини и минерали. Сепак, една супстанција се издвојува по својата важност, а тоа е водата!
Секоја хранлива материја има своја специфична улога во организмот. Протеините како градежни блокови овозможуваат раст и развој, јаглехидратите и мастите го снабдуваат организмот со енергија за извршување на секојдневната работа и физичка активност, а заштитните материи – витамини и минерали, заедно со протеините овозможуваат извршување на многу важни процеси во телото кои го подобруваат нашиот имун систем и помагаат во одбрана против различните вируси и инфекции.
Правилното внесување на сите хранливи материи целокупно ни овозможува да се чувствуваме здраво и добро. Комбинацијата на различни хранливи материи овозможува да имаме добро балансирана исхрана и правилен метаболизам.
Потребите на организмот можат да се задоволат само со комбинација на различни видови храна, бидејќи ниедна единствена храна не ги содржи сите хранливи материи што можат да ги обезбедат дневните потреби на организмот.
Сите луѓе имаат потреба од исти хранливи материи во текот на целиот живот, но во различни количини. Колку хранливи материи ќе му бидат потребни на еден организам, зависи од возраста, полот, степенот на физичка активност и здравствената состојба.
Ова се физиолошките потреби на организмот. Иако изборот на храна е индивидуален и зависи од организам до организам, внесувањето храна сè уште е под влијание на културните, социолошките, економските и психолошките фактори на животот. Постои оптимален внес за секоја хранлива материја.
Како се мери енергетската вредност на храната?
Единица за мерење на енергетската вредност се калориите. Едноставно кажано, калоријата претставува количина на енергија потребна за загревање на 1 грам вода за 1 степен. Бидејќи еден грам е прилично мал – пресметката обично се прави на количина од 1000 грама, а потоа се користи илјадапати поголема единица на калории наречена килокалорија со ознака kCal. Како и да е, во секојдневниот живот името калории останало наместо килокалории, така што често ќе чуете дека некој „држи диета од 1.200 калории“, а не „1.200 килокалории“ поточно кажано.
Значи, бројот на калории во храната е всушност бројот на енергетски единици што телото ги користи за да функционира во секоја смисла – од физичка активност, преку метаболички процеси, до правилна работа на срцето, зацврстување на коските, зараснување на раните или градење мускулна маса.
Само три компоненти во храната содржат калории. Тоа се протеините и јаглехидратите (4 калории на грам), маснотии (9 калории на грам). Витамините, минералите, фитохемикалиите, диететските влакна и водата не содржат калории.
Кога настанува дебелината?
Дебелината се јавува кога внесот на калории е поголем од енергетските потреби за подолг временски период без соодветно трошење енергија. Тогаш вишокот калории се складира во организмот во форма на резерви на енергија (гликоген, масти) и се троши во случај на зголемени потреби на организмот или ако телото гладува. Дебелината нема да се појави ако постои рамнотежа помеѓу внесувањето храна и потрошувачката на енергија.
Дебелата личност тежи повеќе од неговата идеална телесна тежина, а тој вишок е претежно маснотија (85%), а во помала мера вода и мускули. Слабеењето може да се постигне ако телото влезе во дефицит, т.е. не добива доволно енергија за да функционира, а потоа мора да ги искористи депонираните резерви во форма на масни наслаги, да ги претвори во енергија и да го надомести лишувањето од храна.
На овој начин се топи маснотијата, т.е. се губат килограмите. И како што е потребно времето да се соберат штетните масни наслаги кои нè дебелеат, така е потребно време да се потрошат истите, така што важните фактори за секое намалување на телесната тежина се – трпеливост и упорност!
Диета од 1200 калории
План за исхрана за почетници. Појадокот и првата закуска се исти секој ден:
Појадок: 300 мл млеко / јогурт / кефир (1,5% мм) со две лажици овесна каша (230 ккал) и кафе без шеќер (55 kcal).
Прва закуска: едно темно чоколадо 70% какао (48 kcal)
Ден 1
Ручек: 300 г жолта боранија, 150 г ситно сечкани коцки од пилешки гради се варат во солена вода, па се процедуваат. Измешајте со половина чешње лук и лажица кисела павлака од 12% мм (280 kcal). Ужина: 300 г диња или некое друго нискокалорично овошје (85 kcal). Вечера: 2 варени јајца и салата од 200 г домати, 100 г краставици и 50 г кромид (210 kcal).
Вкупен дневен внес: 960 kcal, што остава простор за уште 240 kcal. Преостанатите калории може да ги дополните доколку сте навистина гладни, но со текот на времето ќе се навикнете на овој начин на исхрана и тие калории нема да ви бидат воопшто потребни. Доколку решите да внесете дополнителна ужина, внимавајте да не го надминете внесот на калории.
Ден 2
Ручек: Сварете 200 г пилешко бело месо и 300 г тиквички во солена вода, процедете ги, исечкајте ги на коцки, наросете со копар и зачинете со малку оцет или сок од лимон и црн пипер (по желба, можете да печете и во рерна на хартија за печење ( 300 kcal). Ужина: едно јаболко (80 kcal), кафе (55 kcal). Вечера: Сварете две јајца, а потоа додадете две лажици кисела павлака од 12% мм. Јадете со 300 г салата од домати (220 kcal).
Вкупен внес на ден: со појадокот и првата закуска, која е иста секој ден – 1.020 kcal, што значи дека се дозволени уште 180 kcal.
Ден 3
Ручек: 200 г шампињони, 200 г зелка и 100 г пилешки гради исечени на коцки, динстајте на тивок оган со постојано додавање на вода. Откако сите состојки ќе омекнат и водата ќе испари додадете лажица кисела павлака (12% мм), една лажичка сенф, кари, бибер, ѓумбир и малку лута пиперка по желба (230 kcal).
Ужина: 2 праски или друго нискокалорично овошје (60 kcal) со кафе (55 kcal). Вечера: конзерва туна со 200 г домати (300 kcal). Вкупен дневен внес 985 kcal, дозволени се уште 215 kcal.
Ден 4
Ручек: сварете 300 г карфиол во солена вода, процедете го, а потоа изблендирајте со една лажица кисела павлака (12% мм). Зачинете со малку сол и црн пипер, а потоа сварете или печете еден пилешки батак 150-200 г во рерна без додадено масло, со малку вода. Баракот јадете го со пирето од карфиол (280 kcal).
Ужина: 300 г диња (85 kcal) и кафе (55kcal). Вечера: издинстајте 300 г црвени пиперки со мала лажица маргарин со постојано додавање на малку вода. Кога ќе омекнат пиперките, оставете ја целата вода да испари и додадете изматени 2 јајца. Јадете со 100 г домати или краставици (230 kcal).
Вкупен дневен внес: 990 kcal дозволени се уште 210 kcal.
Ден 5
Ручек: 300 г ослиќ риба варена или печена со салата од 200 г домати, 100 г краставици и 50 г кромид (280 kcal). Ужина: едно јаболко (80 kcal) и кафе (55 kcal). Вечера: 2 варени јајца и салата од 200 г краставици половина чешне лук и 100 мл јогурт 1,5% мм (230 kcal)
Вкупен дневен внес: 990 kcal дозволени се уште 210 kcal.
Ден 6
Ручек: 400 г цели печурки (ако се големи, исечете ги на половина) и сварете ги во 200 мл вода со 50 г кромид. Посолете со црн и црвен пипер. Ручекот е готов кога водата ќе испари целосно. Како прилог исечете 300 г рендана зелка зачинета со црн пипер, сол и оцет или сок од лимон (110 kcal). Ужина: 2 праски (60 kcal) со кафе (55 kcal). Вечера: салата од зелка преостаната од ручекот со 2 варени јајца (200 kcal).
Вкупен дневен внес: 765 kcal. Шестиот ден не е дозволено да ги надополните останатите калории, но доколку премногу гладувате, каснете малку од зелката од ручекот.
Ден 7
Дозволено е да се јаде сè – секако во умерени количини и да внимавате на внесот на калории.
СОВЕТИ: Ова е само груб изглед на диетата. Калориите се пресметани приближно односно некогаш може да додадете повеќе во ручекот, а да одземете во вечерата.
Ова мени можете да го промените, да додадете или одземете одредена храна, можете сосема нешто друго да јадете, но држете се до правилото за внес на 1.200 калории дневно. Не е дозволено консумирање на газирани пијалаци, пржена или премногу зачинета храна и претерано консумирање на слатко.
Повеќето зачини се дозволени освен оние што содржат маснотии за да може храната да се посолува. Дозволено е и масло, но бидете внимателни – една лажица масло има 115 kcal и да речеме пилешки гради имаат 116 kcal во 100 г!
Заедно со оваа диета, се препорачува и умерена физичка активност – првенствено едночасовно пешачење, а повремено и пливање или возење велосипед. Регулирајте ги оброците да бидат во приближно исто време во денот, а вечерата да биде најмалку 2 часа пред да си легнете. Текстот за НМД.мк го напиша Мартина Христовска.
