Ако имате едно јајце, една чаша јогурт и малку брашно, направете ги најдобрите сусам-уштипци. Подготовката е многу брза, а добивате многу вкусни печива кои некои ги нарекуваат „уштипци“, а за мене се едноставни сусамки.
Не впиваат многу масло како другите уштипци, ќе бидете презадоволни. Секој може да ги направи. Многу се економични и едноставни, а вкусот им е одличен. Можете да ги комбинирате со што сакате, а вкусни да се јадат и како закуска. Еве што ви е потребно:
ПОТРЕБНИ СОСТОЈКИ: 1 јајце, 1 рамна чајна лажичка сол, 1 чаша од 200 мл јогурт, 1 супена лажица растително масло, 1 кесичка прашок за печиво (10-12 г), 400 г меко брашно Т400, 5-6 супени лажици сусам и масло за пржење
ПОСТАПКА: Во подлабок сад изматете го јајцето со една мала лажичка сол. Потоа додајте една чаша јогурт и една кесичка прашок за печиво (12 г) и продолжете да матите со кујнска-жица маталка додека да се изедначи смесата.
Додајте една супена лажица масло, промешајте, а потоа започнете постепено да го додавате брашното. Во зависност од тоа како впива, ќе ви биде потребно приближно 400-420 г меко брашно тип 400. Прво сипете 200-300 г, изматете до изедначување, а остатокот додајте го малку по малку.
Мешајте со лажица или шпатула додека да се формира компактна смеса, а потоа тестото замесете го со рака неколку минути додека да стане мазно и да не се лепи за рака. Ова тесто не треба да стасува и може веднаш со него да се работи.
Оставете го 5 минути колку да се опушти, а потоа на набрашнета работна површина развлечете го малку, наросете го со сусам, а потоа со оклагијата дополнително поминете го за да се втисне сусамот во тестото.
Превртете го тестото и повторете ја постапката за да се обложи со сусам од двете страни. По можност обликувајте праволаголна кора за да можете да сечете долгнавести стапчиња/правоаголничиња. Можете да сечете облици какви што сакате.
Загрејте масло со длабочина од два прста на умерена температура, па спуштајте ги уштипците и пржете ги по неколку минутки од двете страни додека да добијат убава златножолта боја. Вадете ги во чинија обложена со хартиена салветка. Видеопрезентацијата погледнете ја ОВДЕ.
