Фото и рецепт: Дијана Талевска
Од Македонска кујна, некогаш и денес
Ќе споделам со вас, драги мои, едно старинско јадење, кои го подготвувале нашите прабаби, баби, мајки, свекрви… Сигурна сум, тие што го подготвуваат го делат моето мислење. Јадењево е исклучително вкусно.
Свекрва ми, секогаш за Божиќ, го споменува ова јадење, кое изгледа порано било традиција-редовно си ја подготвувале оваа вкусна капама.
Потребни состојки:
1 страк праз
2-3 црвени суви пиперки
3-4 лажици доматен сос
1 шолја ориз
1 лажица буковска пипер
3 шлји вода
7-8 месести ребра
1 телешка коцка за супа
по потреба сол
по потреба мешан сув зеленчук
по потреба црна пипер
по потреба масло или свинска маст
Постапка:
Подготовката е лесна и едноставна.
Најпрво се ставаат ребрата (може и удина (кртина) со малку мрсничко) да се варат.
Во водата им додавам сол и коцка за супа.
Празот ситно се сечка и се пржи на мрснотија. Се додава малку сол. Се додаваат и пиперките крупно издробени.
Кога ова е пропржено се додава доматата, па оризот (истребен и измиен).
Се пржи убаво додека почнат да се делат зрната едно од едно. Се трга од оган, се додава пиперот, убаво се изедначува.
Ја налеваме водата и тоа половина од вкупната (1,5 шоља) ладна, а другата половина од водата во која ни се вареше месото. Убаво и лесно мешаме, се додека почне да зоврива водата.
Ја пробуваме за вкус, па зачинуваме со наведените зачини.
Ги редиме сварените ребрата и врз нив може да наросиме од мешаниот сув зачин и црн пипер.
Оставаме да крчка на умерен оган. Кога веќе на половина ни се намалила течноста и оризот е полусварен, ја ставаме тавата во рерна на 200 степени и оставаме да се потпечи и зготви оризот.
Фото и рецепт: Дијана Талевска
Од Македонска кујна, некогаш и денес
