Ова е омиленото макало кое може да се послужи самостојно или како прилог со главното јадење. Кога ќе почнете да го јадете, нема застанување… Толку многу е вкусно! Фотографија и рецепт на Снежана Бошкова.
Потребни состојки: 20-тина зелени пиперки (може неколку лути пиперки, по желба), 10- тина чешниња лук, 3-4 црвени домати, *може и 1-2 модри патлиџани, магдонос по желба, масло за јадење и сол по вкус
Постапка: најпрво измијте ги пиперките, избришете ги и испечете ги убаво од сите страни. Печените пиперки ставајте ги во кеса и оставете ги така да изладат. Потоа излупете ги и извадете им ги семките.
Исто како пиперките, така и доматите запечете ги на оган. Лукчето убаво излупете го, исечкајте го ситно, посолете го и убаво истолчете го. Пиперките исечете ги на помали парчиња, па и нив постепено додавајте ги во лукот и толчете ги.
Толчете ритмично и еднакво за да спојат вкусовите. Потоа додавајте ги исечените домати, па заедно убаво промешајте. Посолете по вкус.
На оган ставете малку масло да се загрее. Кога маслото ќе почне да зоврива, попарете го одозгора пинџурот и убаво промешајте. Оставете некоја минута убаво да се впие маслото и да се соединат вкусовите. Послужете со ситно сечкан магдонос. Фотографија и рецепт на Снежана Бошкова
ВАШИ КОМЕНТАРИ:
Коментар на Панче Иванов: „Може да се користи како салата, а може како јадење со домашно сирење. Може да се додаде и модар патлиџан, се разбира печен, па пинџурот ќе добие уште повеќе на вкус. Пријатно.“
Коментар на Живка Ангеловска: „Три килограми зелен пипер, лут или благ, два килограми црвен домат и два-три модри патлиџани, зависи од големината.
Сè се пече, малку се исцедува во цедалка, па се ситни и се става во сад за толчење, каде претходно е истолчен лук по желба заедно со сол. Убаво се толчи целата смеса. Се загрева маслото и се прелива смесата, се промешува и се остава малку да отстои. Пријатно.“
Прилепско мераклиско МАКАЛО со лути пиперки, ореви и лукче / Фотографија и рецепт на Биљана Николовски
Потребни состојки: 10-15 лути пиперки или мешани, 50 г ореви, 1 главица лук (или по желба)
Постапка: испечете пиперки по желба, можете и да и ги измешате со нелути во зависност од тоа колку луто сакате да биде макалото. Откако ќе остојат малку во најлон ќеса, излупете ги и исчистете ги од семките.
Оревите ставете ги во сад за толчење заедно со лукчињата. Откако ќе ги истолчите, додајте ги и пиперките, па и нив малку истолчете ги. Додајте масло, киселина и сол по вкус. На крај се попарува со врела вода.
Популарно луто макало со везени пиперки, зелени домати и компири / Фотографија и рецепт на Анита Стојановска
Потребни состојки: 3 зелени домати, 4 везени пиперки лути, 3-4 компири, 3-4 чешниња лукче, сол и масло по вкус
Постапка: ова е доста популарно макало во Македонија а се приготвува од зелени домати кои потешко се наоѓаат во продажба. Може да се купат од некој кој одгледува домати под фолија.
Три домати, четири пиперки лути и три до четири компири се варат 30 минути. Потоа се чистат и се толчат со лукче. Се посолува по вкус па се прелева со врело масло. Супер е за мезе, за предјадење со сиренце и маслинки или како прилог на главно јадење.
Традиционално македонско макало / Фотографија и рецепт на Славица Георге
Потребни состојки: 10 пиперки, 1 печена лута пиперка, 2 црвени домати, 5 гранчиња магдонос, 5-6 чешниња лук, масло по потреба, сол
Постапка: пиперките убаво измијте ги, избришете ги па испечете ги. Во сад за толчење ставете го лукот, посолете и истолчете го. Печените пиперки исечкајте ги на парчиња, а потоа додајте ги во садот со лукот. Заедно истолчете ги.
Доматите измијте ги, излупете ги по желба, па исечкајте ги, па и нив лесно истолчете ги. Додајте ги во садот. Додајте сечкан магдонос, измешајте. Додајте сол по вкус и масло кое може да биде ладно или загреано.
Традиционално макало. Ова е традиционално макало од нашето поднебје, а ретко може да се најде и во некој од рестораните.
Потребни состојки: 1 главица лук, ½ мала лажичка сол, 3 супени лажици масло, 3 супени лажици топла вода, 200 мл ладна вода, 2 лажици киселина, 2-3 лути пиперчиња (сирови или печени)
Постапка: исчистеното лукче се посолува и се толчи во аван се додека да се претвори во каша. Потоа се додава лажица по лажица масло, а притоа постојано се толчи со дрвениот толчник.
Се додава топла вода, се промешува и се добива белузлава течност. Се додава ладната вода и оцетот. На крајот се додаваат сечканите лути пиперчиња. Количините се произволни.
