Рецепт и видео презентација на Ивана од „Шерпица” – Зелка салата со специјален прелив.
Пригответе ја оваа „обична” салата на малку поинаков начин и направете ја за гостите да биде специјална. Ќе ви побараат рецепт, исто како што и јас го побарав од тета Мира.
Потребни состојки: средна главица зелка, полесна од еден килограм, а кога ќе се исчисти има околу 800 г, 3-4 млади кромитчиња или 150 г праз (а може и мешано, уште повкусно), 1 полна лажица рен од тегла или изрендан свеж, 2 лажици мајонез (а може и повеќе), 1 лажичка сол, 2 лажички шеќер, сок од половина лимон или 1 лажичка оцет.
Постапка: Оваа салата може да биде и посна доколку користите посен мајонз. Зелката изрендајте ја ситно со ренде или како ви е згодно и посолете ја со една-две лажички сол, па оставете ја малку да отстои за да го ослободи сокот.
Кромитчето исечкајте го на ситни тркалца заедно со зелениот дел. Може да се додаде и малку сечкано лукче и малку сенф за да се збогати вкусот.
Најубаво е сите други состојки да ги измешате заедно во еден поголем сад, па дури потоа смесата да ја додадете во зелката.
Ставете една рамна лажица рен од тегла, две лажици мајонез (подоцна по вкус, може да додадете уште малку), исцедете сок од половина лимон, но потоа додајте уште малку по потреба, потоа додајте две лажички шеќер и уште половина лажичка сол.
Промешајте добро за да се растопат шеќерот и солта. Потоа со раце истискајте ја зелката врз цедалка за да се исцеди вишокот сок. Во исцедената зелка додајте го исечканото кромитче и приготвениот прелив. Додајте малку црн пипер и промешајте.
Ако ја сакате салатата покремаста, додајте уште малку мајонез или кисела павлака по желба. Оваа салата многу добро одговара да се послужи со печено месо. Вкусете и по потреба додајте уште зачини.
Салатата послужете ја во украсна чинија и декорирајте ја со свеж магдонос. Деталите од целата постапка можете да ги погледнете во видеото ОВДЕ.
II РЕЦЕПТ Освежителна салата од праз, не само што е здрава, туку и многу е вкусна – пробајте ја, нема да ве разочара!
Оваа салата е вистинско освежување, па дури и за оние кои не се љубители на празот. Пробајте, нема да ве разочара!
Потребни состојки: 2 страка праз, 2 варени јајца, 2 компири (варени во лушпа, изладени и излупени), 2 чаши кисели павлаки од 180 г, 2 кесички лајт мајонез, 200 г шунка и околу 100 г рендан кашкавал
Постапка: празот тенко исечкајте го. Варените јајца изрендајте ги на покрупно ренде. Варениот компир исто така, изрендајте го крупно. Потоа додајте ги киселите павлаки и мајонезот. Шунката исечкајте ја на ленти или коцки, по ваша желба.
Сите состојки добро промешајте ги за да се изедначат и посолете по вкус. Смесата ставете ја во сад за сервирање и одозгора нарендајте кашкавал. Може да се јаде како самостојно јадење, а одлично одговара со ладни печења. Мора да ја пробате оваа салата!
III РЕЦЕПТ Крем салата од свежа зелка – лесна за приготвување, а во фрижидер може да стои „додека да се изеде”
Ќе ви претставиме две верзии од оваа салата, па вие одлучете се која повеќе ви одговара. И двата рецепта се проверено добри а се разликуваат малку по составот. Оваа салата е многу лесна за приготвување, а може да стои во фрижидер “додека не се изеде”. Многу добро одговара со сите видови месо, а особено е добар прилог за скара. Се мери со шолја од 250 мл.
Потребни состојки: 1 главица зелка, тенко сечена или рендана, 1 шолја мајонез, ½ шолја маслиново масло, 1 лажица сенф, 3-4 лажици шеќер, 1 лажица паста од рен или само малку свежо изрендан, 1 лажица ситно сечкан магдонос, 3-4 млади кромитчиња, 3 чешниња лук, 1 лажичка сол, бел оцет по вкус и малку црн пипер
Постапка: ренданата или сечканата зелка ставете ја во поголем сад и сосем малку посолете, оставете малку да омекне и пригответе го преливот. За прелив земете млад кромид, магдонос, лук и сето исечкајте го колку можете поситно или ставете го во секач.
Потоа додајте ги сите останати состојки да добиете крем. Закиселете го по вкус. Готовиот прелив измешајте го со зелката, малку измешајте и изг-мечете со рацете, па оставете во фрижидер да се соединат сите состојки. Салатата е готова. Во оваа салата можете да додадете и рендан морков и малку препечена сланина која претходно сте ја исечкале.
IV РЕЦЕПТ (ВТОРА ВЕРЗИЈА): Coleslaw – кремаста салата од зелка
Ова е една верзија од салатата што ја пробав на гости, а ја збогатив со зрна од калинка по мој вкус.
Потребни состојки: 500 г зелка, 100 г целер (корен), 100 г морков, 1 лажица рендан ѓумбир, 1 шолја зрна од калинка, по вкус сол и црн пипер, 1 лажица сечкан лист од целер, 4 лажици винска киселина, 4 лажици мајонез (или 2 лажици мајонез+ 2 кисела павлака)
Постапка: зелката исечкајте ја тенко или изрендајте ја. На крупно ренде изрендајте ги морковот и целерот. Ситно изрендајте го ѓумбирот. Ставете сè во чинија и измешајте. Одозгора наросете бобинки од калинка.
Во помала чинија измешајте го мајонезот, или доколку сакате измешајте мајонез и павлака, додајте оцет, сол, црн пипер и ситно сечкани листови од целер. Прелијте ја салатата одозгора и добро промешајте.
Салатата префрлете ја во чинија за сервирање и послужете. Одлично одговара како предјадење, со мезе или како салата со главно јадење.
