Пирошки со меко тесто и фил од компир
Овој рецепт за пирошки со воздушесто тесто и вкусен компирен фил е вистинска тајна на мајсторите за домашна кујна.
Подготвени со едноставни состојки, овие пирошки се меки како перничиња и совршени за секоја пригода.
Следете ја постапката и уживајте во топлите, домашно приготвени пирошки што ќе ги воодушеват сите, пишува НМД. Еве што ви е потребно:
Потребни состојки
За тестото:
– 400 мл вода од варен компир (млака)
– 1 јајце
– сол по вкус
– 10 г свеж квасец (или 5 г сув квасец)
– 50 мл растително масло
– 600 г брашно
За филот (може и по ваш избор):
– 800 г компир
– 1 главица кромид
– сол по вкус
– црн пипер по вкус
– растително масло за пржење
– НМД
Постапка
1. Подготовка на тестото: Излупете и исечете 800 г компир, па сварете го во вода. Откако компирот ќе се свари, исцедете го и зачувајте 400 мл од водата во која се варел.
Оставете ја водата да се излади до млака температура. Во млаката вода додајте го јајцето, сол по вкус и свежиот или сувиот квасец.
Измешајте со виљушка додека состојките добро да се соединат. Постепено додајте 600 г брашно и 50 мл растително масло.
Месете додека да добиете меко и еластично тесто што минимално се лепи за рацете. Тестото ставете го во намастен сад, премачкајте го одозгора со малку масло и покријте го со проѕирна фолија или пластична кеса.
Оставете го на топло место да ферментира 1,5 до 2 часа, додека да го удвои волуменот.
2. Подготовка на филот: Сварениот компир испасирајте го додека да добиете мазна смеса. Во тава на средна температура загрејте малку растително масло и пропржете ја ситно исечканата главица кромид до златеста боја.
Додајте го пржениот кромид во пасираниот компир исцеден од маслото, посолете и зачинете со црн пипер по вкус. Добро измешајте за да се соединат состојките.
3. Формирање на пирошките: Откако тестото ќе стаса, истресете го на лесно намастена работна површина. Поделете го на 10 еднакви дела.
Со намастени дланки, секој дел обликувајте го во топче, а потоа сплескајте го во круг. Во средината на секој круг ставете дел од компирниот фил.
Преклопете го тестото преку филот и внимателно затворете ги краевите, формирајќи пирошка. Лесно развлечете ја пирошката за да добие издолжена форма.
4. Пржење: Во длабока тава загрејте растително масло (1,5–2 см длабочина) на средна температура. Пржете ги пирошките од двете страни додека да добијат златеста боја. Вадете ги на хартиена салветка за да се исцеди вишокот масло.
5. Послужување: Послужете ги пирошките топли, самостојно или со прилог по желба.
Уживајте во овие меки и вкусни пирошки што ќе го освојат секое срце! Постапката можете да ја погледнете во видео прилогот ОВДЕ:
