Џемот од модри сливи има специфичен, неодолив вкус кој совршено одговара за разни слатки, торти, палачинки, на лепче…

Овој рецепт е за наједноставната подготовка која не бара постојано да мешате и да стоите врз шпоретот. Џемот, едноставно се пече во рерна.

Потребни состојки:

5 кг модри сливи
600 г шеќер

Совет: Доколку приготвувате од црни-модри сливи кои не се премногу слатки, за нив на 3 кг приближно се става 1 кг шеќер. Може да додадете пред крајот и 150 мл рум за вкус, 2-3 ванилин шеќер (малку цимет) и 20-тина мл вински оцет ( ½ филџан за кафе) кој се става 15-тина минути пред крај за да има џемот убава црвена боја, мирисот испарува и не се чувствува (по желба, не е споменато во видеото)

Постапка:

Модрите сливи убаво измијте ги во неколку води, а потоа преполовете ги и исчистете ги од семките. Ставете ги во некое големо тенџере. Рерната вклучете ја да се загрева на 250 степени.

Исчистените сливи ставете ги на оган на рингла само колку да провријат, една минута. За тоа време рерната ќе се загрее.

Провриените сливи вратете ги во тенџерето во кои ќе се печат, па ставете ги во загреаната рерна. Некаде на половина од печењето извадете ги, ќе забележите дека го пуштиле сокот.

Додадете половина килограм шеќер а по потреба додадете уште. Промешајте и вратете во рерна да се допече. Повремено проверувајте и промешувајте го џемот, приближно на секој половина час откако ќе започнете со печењето.

Во зависност од сочноста и сортата на сливите, џемот треба да се готви приближно 2-3 часа. Кога мислите дека е готов, извадете малку на тацна и оставете да излади, па проверете ја густината.

Врелиот џем собирајте го во тегли и затворајте ги и превртете ги наопаку за да се вакумираат. Оставете ги да изладат до послужување. Деталите од постапката можете да ги погледнете во видеото: