Зошто Бог не ги услишува сите молитви? Отец Дејан објаснува кога желбите на човекот не можат да бидат благословени
Молитвата за многу луѓе е најдлабок разговор со Бога – момент кога човекот со надеж, вера и искреност ги изнесува своите грижи, желби и надежи.
Но, честопати се случува верниците да се запрашаат зошто некои молитви, и покрај искреноста и упорноста, остануваат без одговор.
Според православното учење, Бог не е должен да ја исполни секоја човечка желба. Наместо тоа, Тој му го дарува на човекот она што е навистина добро за неговиот духовен живот и спасение.
За ова говореше и отец Дејан Крстиќ, кој објаснува дека постојат молби што, без разлика колку упорно се повторуваат, не можат да бидат благословени.
„Господ, колку и да се молиме, никогаш нема да благослови грев, затоа што гревот е оддалечување од Него. Нема да благослови нешто што ја руши љубовта, бидејќи самиот Бог е љубов“, истакнува отец Дејан.
Тој додава дека молитвите не можат да бидат средство преку кое човекот ќе ја наметне сопствената волја, туку пат преку кој човекот постепено се усогласува со Божјата волја.
Бог не благословува неправда и омраза
Според неговите зборови, Господ никогаш не благословува неправда, лага, измама или насилство – дури и кога тие се прикриваат зад побожни зборови.
„Бог не благословува гордост и самооправдување, кога човекот бара од Бога да ја потврди неговата волја, наместо да се преиспита и да се приближи до вистината“, објаснува тој.
Особено е важно, нагласува отец Дејан, дека молитвите не можат да бидат насочени кон нешто што му нанесува болка или понижување на друг човек.
„Не можеме да бараме благослов од Бога, а истовремено да ја газиме иконата Божја во човекот покрај нас.“
Слободата е дар што Бог не го нарушува
Во православната духовна традиција, слободата на човекот се смета за еден од најголемите дарови. Затоа, Бог не благословува ништо што ја нарушува слободата – ниту нашата, ниту слободата на другите.
„Бог не спасува на сила. Тој не влегува во срцето без нашата согласност. Љубовта не трпи присила“, нагласува отец Дејан.
Токму затоа, манипулацијата, притисокот или обидот да се наметне „доброто“ против нечива волја не можат да добијат Божји благослов.
Ниту одмаздата не може да биде дел од молитвата
Во моменти на болка и неправда, човекот понекогаш во молитвата бара казна за другиот или исполнување на сопствената огорченост. Но, таквите желби, според духовниците, не можат да бидат дел од вистинската молитва.
„Бог не благословува одмазда, злопамтење и омраза. Тој благословува исцеление, простување и преображение на човекот“, вели отец Дејан.
Затоа, суштината на молитвата не е Бог да стане извршител на нашите желби, туку човековото срце постепено да се очисти и да научи да го посакува она што е добро, вистинито и спасоносно.
Во духовниот живот, токму таа промена – од желба кон смирение и љубов – се смета за најголемиот одговор на молитвата.
