Направете ги овие вкусни орасници кои се приготвуваат многу лесно, брзо и едноставно. Јас ги правам долги години по нарачка, толку многу се вкусни што сите ќе ги изедете во едно седнување. Одамна ме прашуваа пријателките за рецептот, но сè досега го криев и не го кажував никому.
Поедноставни, а повкусни од овие колачи не можете да најдете. Едноставно се неодоливи. Слатки, вкусни, се топат во уста. А толку лесно се приготвуваат, би било штета да не ги пробате. Ви го откривам рецептот и сега можете и самите да си ги направите. Еве што е потребно:
ПОТРЕБНИ СОСТОЈКИ: 500 г просеано брашно, 200 г маргарин/путер, 50 г шеќер, прстофат сол, 10 г прашок за печиво (1 кесичка), 1 јајце, 200 мл кефир (може да се замени со кисела павлака). ЗА ФИЛОТ: 250 г ореви, 1 кесичка ванилин шеќер, 200 г шеќер, 1 белка, цимет (опционално).
ПОСТАПКА: Маргаринот/путеро замрзнете го накратко за да може да го изрендате во брашното. Во еден подлабок сад просејте половина килограм брашно, па ставете ја целата коцка замрзнат путер и малку наквасете ја во брашното, за да не ви лепи. Потоа, започнете да го рендате во брашното со лесно соединување.
Откога ќе го соедините путерот, со рацете добро измесете ја смесата за да не остануваат поголеми грутчиња. Путерот лесно ќе се растопи со благо месење. Додајте 1 кесичка прашок за печиво, 50 г шеќер, прстофат сол, 1 јајце и 200 мл кефир. Овие состојки се додаваат во мала вдлабнатина во брашното, и се замесува тесто со постепено нафрлање на брашното кон средина.
Замесете фино и меко тесто кое треба да биде компактно и да не се лепи за рацете. Погрижете се целиот сад да биде исчистен од брашното и останатите состојки, така што сѐ ќе соберете во тестото. Тестото се меси кратко време додека да се соедини и да стане мазно. Вака подготвеното тесто ставете го во кеса или покријте го во садот со стреч-фолија и оставете го во фрижидер околу 20-тина минути, а во меѓувреме спремете го филот.
ЗА ФИЛОТ: Оревите ставете ги во тенџере или тавче на рингла и сосем малку истостирајте ги додека да ја пуштат својата прекрасна арома, околу 3-4 минути. Потоа префрлете ги во блендер или кеса и со оклагија изгмечете ги, додека целосно да се сомелат. Сомелените ореви ставете ги во подлабок сад и во нив додајте ги останатите состојки за филот: 1 кесичка ванилин шеќер, 200 г шеќер, 1 белка и цимет по вкус.
Соединете ги состојките, па преминете на тестото. Ладното тесто префрлете го на набрашнета површина и поделете го на два дела. Едниот дел вратете го во кесата, а другиот развлечете го со оклагија, на набрашнета површина. Тестото се развлекува во правоаголен облик, колку подолго и потенко можете. Потоа, низ целата кора се премачкува со половина од филот.
Вака подготвеното тесто завиткајте го од подолгата страна како ролат или палачинка. Тестото е толку тенко што навистина добива изглед на џиновска палачинка. Премачкајте го со 1 жолчка и потоа со нож исечете го на помали парчиња во косина (сечењето може да го правите и со ребрест нож, за колачите да изгледаат попривлечно).
Обично од еден ролат излегуваат 10 или 11 колачи. На истиот начин подгответе го и второто тесто, па колачите редете ги одвоени во плех, обложен со хартија за печење, со отворениот дел од филот кон плехот, а не нагоре. Печете во претходно загреана рерна на 180 степени, 30-35 минути. Деталите погледнете ги ОВДЕ.
