Светскиот ден на донирање на органи се одбележува на 13 август секоја година. На овој ден здруженијата и подржувачите на оваа хумана кауза преземаат многубројни активности во насока на подигнување на свесноста и мотивирање на луѓето да ги донираат своите здрави органи по смртта, а со тоа да спасат животи.

Континуираното информирање има воедно за цел да ги елиминира митовите и стравовите што постојат поврзани за дарувањето на органи и секако да станат свесни за важноста на овој чин.

Што всушност претставува органодарителството?

Тоа е доброволно дарување на органи без надоместок од живо или починато лице и нивно пресадување во телото на друго лице заради лекување.

Во Македонија законската регулатива за трансплантација на органи и ткива е многу современа. Таа е регулирана согласно Законот за земање и пресадувањe на делови од човечкото тело, заради лекување.

Законот предвидува освен донирање на орган од жив дарител кој може да донира бубрег, коскена срцевина, дел од црн дроб, како донор на органи да се јави и лице кое се наоѓа во состојба на мозочна смрт, така наречена кадаверична трансплантација.

Семејствата треба да знаат дека мозочната смрт на нивниот близок е исто што и смрт. Само прашање е на време, час или ден два кога ќе настапи и цела смрт. Голем е чинот и неизмерна хуманоста, во овие моменти да се овозможи да се продолжи животот на оние луѓе кои болеста им оневозможила нормално секојдневие.

Zan Mitrev Clinic го подржува органодарителството.