Лековит сос од печени пиперки – штипски специјалитет
„Овој, да го наречам лек за грип, го научив од штипјани додека живеев таму и оттогаш постојано го подготвувам кога ќе залади.
Вкусот е преубав, а богами и мирисот“, пренесе Јулијана Миовска во групата НМД рецепти. Притоа, за читателите откри и еден многу ефикасен, народен лек за болно грло, кој можете да го прочитате подолу во текстот.
Овој традиционален рецепт, познат како „Свирипиле“, потекнува од Штип и е вистински домашен лек за студените денови.
Со својата едноставна подготовка и богат вкус, овој сос не само што ги стоплува сетилата, туку и нуди природна поддршка при настинки, кашлица и болки во грлото.
Совршен во комбинација со сарма или тавче гравче, овој специјалитет носи автентичен македонски шмек на трпезата. Еве што ви е потребно:
Потребни состојки:
– 7-8 суви црвени пиперки (везени)
– 4-5 чешниња лук
– 1 лажичка сол
– 1 лажичка лута буковска пипер
– 1 лажичка блага буковска пипер
– 50 мл или повеќе врела вода
– 2 лажици масло или повеќе
– 50 г ситно сечкани ореви (по желба)
Постапка:
1. Сувите црвени пиперки ставете ги на рингла и печете ги кратко, додека да стврднат и да замирисаат. Потоа, оставете ги малку да се изладат.
2. Испечените пиперки искршете ги на помали парчиња и ставете ги во длабока чинија.
3. Во дрвен аван, истолчете ги лукот и солта додека да се добие хомогена смеса.
4. Додајте ги лутата и благата буковска пипер во аван и продолжете со толчење за да се соединат вкусовите.
5. Префрлете ја смесата од аван во чинијата со искршените пиперки и добро измешајте. Или сѐ истолчете и измешајте во аванот.
6. Прелијте ја смесата со врела вода и додајте го маслото. Промешајте за да се соедини течноста со останатите состојки.
7. По желба, додајте ситно сечкани ореви за дополнителна текстура и вкус.
8. Оставете го сосот кратко да отстои за да се развијат аромите пред да го послужите.
Напомена:
Густината на сосот може да се прилагоди со количеството на пиперките и водата според личен вкус.
За природен лек против кашлица и болно грло, дополнително може да се примени облога од крпа натопена со ракија и посипана со црн пипер, која се завиткува околу вратот и се остава преку ноќ.
Уживајте во овој вкусен и лековит штипски специјалитет! Уште 3 рецепти за СВИРИПИЛЕ можете да прочитате ОВДЕ:
