Ова е една од најфините пити чиј рецепт е запишан во мојата стара тетратка кога бев млада домаќинка. Го правев двапати во три дена и секогаш со него се засладувавме после ручек или го послужував со кафе. Рецептот го добив од вработената на шалтер во една банка, дамнешните 80-ти години и оттогаш редовно го правев, но носев дури и на работа и сите ми бараа рецепт.

Некогаш го правев обично во правоаголна тава, а некогаш во тркалезна и го декорирав различно. Беше задолжителен колач за Божиќ и Велигден и никогаш не ни здодеа. Поради напливот на нови рецепти некако го подзаборавивме овој чоколаден колач, па време е да се потсетиме на него. Ако не сте го пробале досега, запишете си го рецептот, нема да се покаете. Еве што ви е потребно:




ПОТРЕБНИ СОСТОЈКИ за плех 20х32 см: 400 г остро брашно (одвојте 50-тина грама за развлекување), 200 г путер или маргарин и 150 г испрана маст, 100 г шеќер во прав, 2 жолчки, 2 супени лажици кисела павлака, за вкус: малку рум + лимонова кора + прстофат сол.

ЗА ФИЛ: 200 г шеќер во прав, 4 жолчки, 100 г чоколадо, рум + 4 лажици лебни трошки, 1 рендано јаболко, 1-2 лажици џем, 6 белки (снег), 5 лажици мелени ореви (70-тина г), 1 кесичка ванилин шеќер со вкус на рум.




ПОТРЕБНИ СОСТОЈКИ за тркалезен калап 26 см: 300 г брашно, 200 г путер (или 100 г путер + 130 г маст), 100 г шеќер во прав, 1 кесичка ванилин шеќер, 1 лажица кисела павлака, 1 прстофат сол, 2 жолчки. За фил: 100 г чоколадо, 1 до врв полна лажица џем, 100 г шеќер, 3 жолчки, 50 г мелени ореви + 2 лажици лебни трошки натопени во рум, 5 белки




ПОСТАПКА: Од брашното (350 г), путерот (200 г) и 1 до врв полна супена лажица испрана маст, шеќер во прав, прстофат сол, ванилин шеќер и 2 жолчки замесете фино тесто и поделете го на 2 валјаци за подоцна полесно да се развлечат корите за плех 20х32 см. Во тестото по желба додајте малку рум и ситно рендана кора од лимон за вкус.




Завиткајте го во кеса или проѕирна-стреч фолија и оставете го во фрижидер 2 часа или најмалку 30 минути (или ако ви се брза, кратко време во замрзнувач, колку да се стегне). За правоаголна пита направете валјаци, а за тркалезна дискови. Додека тестото одмора направете го филот за питата:




Од белките изматете цврст снег со миксер. Жолчките и шеќерот во прав пенасто изматете ги додека да станат кремасти. Чоколадото растопете го на пареа и џемот на ниска температура со непрекинато мешање внимавајќи да не загори. Оставете неколку минути чоколадото да подизлади.




Во чоколадото додајте ги жолчките претходно изматени со шеќерот во прав, па сето заедно уште еднаш изматете го со миксер за да се соединат состојките. Потоа миксерот повеќе не ви е потребен, па додајте го постепено снегот од белки и мешајте со лажица полека и бавно, превртувајќи ја смесата од долу нагоре.




Кога ќе се изедначи, во чоколадната смеса додајте ги мелените ореви и лебните трошки натопени во рум (или само мелени ореви наместо трошки). Кога ќе го завршите филот, намастете го калапот со путер и наросете го со лебни трошки или брашно. Од двата валјаци развлечете тенки кори според големината на калапот.




РЕДЕЊЕ: Поставете ја првата кора на дното по подготвениот калап. Врз тестото распоредете го целиот фил и израмнете, а врз филот внимателно, со помош на оклагијата поставете го и второто тесто развлечено во кора.

Втората кора која се става одозгора можете да ја исечете на ленти, па да ги испреплетете како решетка, или со некоја модла да вадите интересни фигури и само да ги притиснете со прстот за да навлезат во филот. Филот по конзистенција е сличен на тестото за палачинки, па ако ви се чини дека е редок, не грижете се, таков треба да биде.




Чоколадната пита ставете ја да се пече во претходно загреана рерна на 180 степени приближно 35-40 минути, во зависност од рерната, но сепак проверете со тенко дрвено стапче (ако излезе суво кога ќе ја боцнете питата на неколку места, значи дека добро е испечена). Но, внимавајте да не ја препечете. Питата е сочна и малку влажна. Рецепт на Анка / Сооlinarika.сom