Овој трик за подготвување на пилешкото во тавче го научив од еден ресторан. Пред 15-тина години во еден ресторан нарачав пиле и беше пресочно и многу меко. Кај нас тогаш не се правеше вака, па го прашав готвачот како го подготвил, а тој ми кажа дека го подготвува во тавче.
Ми напиша на ливче како се подготвува и на колку време треба да се врти, да се дотура вода итн… Целиот процес може да го прочитате подолу во продолжение. Можете да подготвувате и поголемо и помало пиле на овој начин. Јас обично земам мало пиле од 1 кг или 1,5 кг и секогаш излегува многу сочно, овој рецепт ме нема изневерено. Еве што ви е потребно:
ПОТРЕБНИ СОСТОЈКИ: мало пиле од 1 кг (1,3 или 1,5 кг), 350 мл вода, 180 г путер и малку масло, зачини по вкус (сол, црн пипер, зачини за пилешко, лук во гранули, црвена зачинска пиперка), 5-6 чешниња лук, 6 компири, 1/2 лажичка шеќер, 200 г доматен сос, 1 лажичка јаболков оцет, копар и магдонос.
ПОСТАПКА: Ставете го пилето на дрвена даска и пресечете го надолжно по средината на градите. Тоа може да го направите со кујнски ножици, бидејќи е многу полесно, отколку со нож. Отворете го пилето за да се израмни подеднакво и со салфетка пребришете го за да се отстрани вишокот вода.
Избришете го пилето од предната и задната страна и со кујнско чеканче чукајте го на неколку места за уште малку да се израмни и при печењето да се зготви подеднакво. Во посебен сад измешајте ја солта, црниот пипер, лукот во гранули, црвена зачинска пиперка и специјални зачини за пилешко по вкус). Ставете ги зачините по ваша желба, колку што ви е вкусно.
Измешајте ги зачините и распоредете ги од двете страни на пилето. Со прстите протријте ги зачините за малку да се впијат во пилето. Во едно тавче ставете коцка путер и почекајте да се растопи. Додајте и малку масло, доколку сакате, а можете и само да ставите повеќе путер. Кога путерот ќе се растопи ставете го месото со задната страна на висока температура и малку потиснете го со шпатула, додека да фати коричка.
Превртете го месото на другата страна и пржете го додека да фати коричка. Поминете низ преса 1-2 чешниња лук или ситно исечкајте ги и измешајте ги со 150 мл обична вода. Прелијте ја водата во тавчето со пиле од страните, ставете една чинија врз пилето и малку притиснете го. Оставете да се готви 30-40 минути, со повремено превртување, за подеднакво да се испече.
Одозгора покријте со капак и гответе го пилето, додека во меѓувреме ги сечете компирите. Добро измијте ги и исечете ги од едната страна, колку да се открие внатрешноста на компирите. Потоа направете засеци на средината, но не ги сечете целосно компирите (како што е прикажано на видеото подолу).
Наредете ги компирите во еден плех, одозгора посолете ги и малку намастете ги, па ставете да се печат во претходно загреана рерна на 180 степени, околу 40-тина минути. Магдоносот ситно исечкајте го, ставете го во еден подлабок сад и посолете го и додајте црн пипер и други зачини по вкус. Исто така, додајте и неколку чешниња лук, околу 3-4 или повеќе.
Доматната паста измешајте ја со 200 мл вода и прелијте ја во садот со магдонос. Додајте 1/2 лажичка шеќер и соединете ги состојките во еднолична смеса. На крајот во смесата вмешајте 1/2 лажичка јаболков оцет. Врз преостанатиот омекнат путер, додајте малку сол и лук во гранули, а потоа исечкајте го копарот ситно (може да користите и сув).
Копарот измешајте го со путерот, додека да се направи фина паста која треба да ја прелиете врз испечените компири, во вдлабнатините. Вратете ги компирите да се допечат уште 5 минути, а потоа послужете ги заедно со пилето. Деталите од целата постапка можете да ги погледнете во видеото ОВДЕ.
