Дождливата пролет не помогна во процесот на уништување на комарците, а топлото лето само го поттикна нивното ширење. Толку многу луѓе се жалат на каснување од комарци овие денови, но некои се жалат повеќе од другите.
Некои луѓе се чини ги привлекуваат како магнет. Зошто е тоа така и дали вашата крв е „послатка“ за комарците од другите луѓе?
Специфично е што секогаш нè каснуваат на некое незгодно место каде што кожата е најтенка – на зглобовите и на прстите, на места покрај рабовите од облеката и сл.
Сепак, секогаш има барем една личност во друштвото што не им се допаѓа на овие досадни крвопијци. Таа не се испрскала со никакво средство против инсекти, но едноставно не се чеша по целото тело како нас останатите, а ова е најдобрата заштита од комарци.
– Јас го „имам“ овој феномен. Мислам дека никогаш немав забележано дека не ме сакаат комарците , сè додека не стапив во врска со мојот сегашен сопруг.
Заедно отидовме на првиот летен одмор и тој постојано кукаше и се жалеше од комарците, купуваше разни средства против бубачки и нанесуваше креми на црвените испакнатини што ги имаше по целото тело. А јас? Ништо – вели Татјана И од Белград за „Блиц“.
Таа објаснува дека не ни знаела дека комарците се толку напорни за некои луѓе бидејќи практично не се ни сеќава кога последен пат ја каснал комарец!
– Отпрвин не му верував на мојот сопруг, а потоа ги избројав нерамнините на неговото тело. Некогаш ги имаше и преку 20! Додека кај мене ништо, во најлош случај, еден мало каснување некаде на раката што не ме чешаше многу.
Не правев ништо посебно различно од него, имавме исто движење, а не ставам ни спреј против комарци како мојот сопруг – вели Татјана.
Иако случаите како онаа на Татјана не се сосема ретки, факт е дека сите донекаде и завидуваат на оваа способност. Многумина би сакале да знаат која е нивната тајна, но ни науката не ја открила целосно.
– Во принцип, не постои научна причина за ова. Единствено што се знае е дека комарците одат на повисока телесна температура и каде влажноста е поголема – изјави за „Блиц“ д-р Милена Турубатовиќ.
Некои од потенцијалните фактори кои можат да влијаат да бидете цел на овие крвопијци се топлина, пот, мирис, алкохол, бои, но и јаглерод диоксид.
Јаглерод диоксид
Сите ние испуштаме јаглерод диоксид кога издишуваме. Ние, исто така, произведуваме повеќе кога сме активни, на пример за време на вежбање.
Комарците можат да детектираат промени во јаглерод диоксидот во нивната околина. Истражувањата покажале дека различни видови комарци можат различно да реагираат на јаглерод диоксид.
Зголемувањето на јаглерод диоксидот може да го предупреди комарецот дека потенцијалниот домаќин е во близина. Комарците потоа ќе се движат кон тоа подрачје, пишува Healthline.
Мирис на телото
Комарците ги привлекуваат одредени соединенија кои се присутни на човечката кожа и пот. Овие соединенија ни даваат специфичен мирис кој може да ги привлече комарците.
Неколку различни соединенија се идентификувани како привлечни за комарците. Некои со кои можеби сте запознаени вклучуваат млечна киселина и амонијак.
Истражувачите сè уште ги истражуваат причините за варијациите во мирисот на телото што ги прави одредени луѓе попривлечни за комарците. Причините може да вклучуваат генетика, одредени бактерии на кожата или комбинација од двете.
Бои
Истражувањата покажале дека комарците ги привлекува црната боја, но малку се знае зошто. Без разлика, ако носите црна или други темни бои, можеби ќе бидете попривлечни за комарците.
Алкохол
Една мала студија од 2002 година се занимавала со ефектот на консумирањето алкохол врз привлечноста кон комарците. Истражувачите откриле дека луѓето кои пијат пиво се попривлечни за комарците отколку луѓето кои не пијат пиво.
