Лажна МИЛКА ТОРТА или ПУДИНГ торта – комбинација од бисквити и крем…Секој залак се топи во уста…Многу лесна, кремаста торта.
Потребни состојки:
200 г бисквити
70 г црно чоколадо
50 г шеќер во прав
100 г путер или маргарин на собна температура
2-3 лажици ладно млеко
За пудинг-крем:
1,2 литар млеко
160 г пудинг од ванила (4 пакувања по 40 г)
140 г шеќер
И уште:
200 г милка чоколадо со лешници
100 г бело милка чоколадо
500 мл слатка павлака
30-40 г пропржени и издробени лешници
Постапка:
Бисквитите искршете ги, чоколадото изрендајте го, путерот исечете го на ленти. Во еден сад ставете биксвитите, чоколадото, шеќерот и путерот, а на крај додајте го млекото. Со раце замесете ја смесата од која ќе добиете средно меко тесто.
Во калап за торти на дното ставете хартија за печење, а врз хартијата со рака убаво и рамномерно распоредете ја смесата од бисквити.
За крем: Во 200-300 мл млеко промешајте го прашокот за пудинг со малку шеќер, а остатокот од млекото и шеќерот ставете ги на оган да зоврие.
Во врелото млеко со постојано мешање додајте ја смесата за пудинг и варете неколку минути додека да се згусне.
Варениот пудинг веднаш поделете го на два дела, и уште додека е врел, во едниот додајте чоколадо со лешници, а во другиот бело чоколадо. Чоколадите претходно искршете ги на коцки за полесно да се растопат.
Двете креми од пудинг покријте ги со проѕирна фолија за да не фатат тврда коричка одозгора и оставете ги да изладат. За тоа време изматете ја слатката павлака во шлаг, а шлагот поделете го на 4 делови.
Кога пудингот ќе излади, со миксер изматете го и во секој дел ставајте лажица по лажица, по четвртина од шлагот. Врз подлогата ставете еден крем, потоа една четвртина шлаг, па вториот крем и на крај последната четвртина шлаг.
Одозгора посипете лешници, па ставете во фрижидер на неколку часови или преку ноќ за убаво да излади и да се стегне.
