Фотографија и рецепт на Верче Илиоска – Домашно приготвен кукурек.
Кукурек се прави со плетење на јагнешки цревца, крезли и шкембиња исечени на ленти. Некои го знаат тоа посебно плетење и сами си го прават, но повеќето од нас го купуваме готов, исплетен од месарница.
Ова е традицинално јадење и најчесто се приготвува напролет. Се смета за еден од најдобрите јагнешки специјалитети. Многу лесен и многу вкусен и пикантен. Направете го и уверете се.
Потребни состојки: 1 парче плетен кукурек, 2-3 ловорови листови, 1 лажичка црн пипер во зрно и малку сол.
За сос (сафт): 3-4 лажици брашно, 1 лажица буковски лут пипер – лут црвен пипер, толчен на крупно, 1 лажица сув зачин (вегета), 1-2 лажици суво нане – мента, вода за сето да се соедини, не премногу густо, масло за да се прелие кукурукет пред печење и уште малку сол ако е потребно
Постапка: кукурекот ставете го во тенџере со вода да зоврие 2-3 минути, па фрлете ја првата вода. Налејте втора вода и оставете да се вари. Додека се вари кукурекот, додајте ловоров лист, црн пипер во зрно и малку сол.
Кукурекот е варен кога лесно се прободува со виљушката. Варениот кукурек префрлете го во тава и полејте го со течноста во која се варел. Ако е потребно, додадете уште малку вода. Кукурекот треба само малку да вирее над водата.
Во посебен сад измешајте: брашно, црн пипер, сув зачин, буковка пипер – мо можност лута и суви издробени ливчиња од нане.
Во садот додајте ладна вода и изедначете ја смесата да не биде многу густа. Потоа оваа мешавина додајте ја во врелата вода со кукурекот, со постојано мешање за да не се направат грутчиња. Треба да се внимава со солта, бидејќи половина од течноста ќе испари за време на печењето.
Пред печењето кукурекот малку прелијте го со масло одозгора. Ставете да се пече во загреана рерна на 230 степени додека да се запече и малку да зарумени.
Кукурекот се послужува исечен на делови, заедно со сафтот. И секако, најдобро оди со чаша добро вино.
Фотографија и рецепт на Верче Илиоска
