ФЕРЕРО ТОРТА…Секогаш омилена, кремаста симфонија од чоколадо и лешници…
Фереро тортата е вистински десертен спектакл, инспириран од легендарните Ferrero Rocher пралини, чие потекло се врзува за италијанската компанија Ferrero, основана во 1946 година од Пјетро Фереро.
Овие чоколадни топчиња, со нивната богата комбинација од лешници, млечно чоколадо и кремаста срцевина, станаа светски феномен, а тортата што го носи нивното име е достојна почит кон овој наследен вкус.
Оваа торта е раскошна комбинација од мек бисквит, крцкави кори и две неодоливи креми – една со интензивен вкус на чоколадо и друга со Нутела и маскарпоне, надополнета со аромата на печени лешници.
Совршена за свечени моменти или за уживање во секојдневието, оваа торта ќе ги воодушеви сите љубители на слатките задоволства, пишува НМД. Еве што ви е потребно:
Потребни состојки за калап со пречник 20 см
*За калап со пречник 26 см зголемете ги количините двојно.
За 1 бисквит (х2):
– 3 (х2) белки
– 3 (х2) лажици шеќер
– 1 (х2) рамна лажица какао во прав
– 2 (х2) лажици мелени лешници
– 1 (х2) лажица лебни трошки
– Калап со пречник од 20 см
*Од оваа смеса се печат вкупно 4 кори.
За крцкави кори:
– 100 г брашно
– 50 г путер
– 1 жолчка
– 1,5 лажица ладна вода
– 25 г шеќер во прав
– 15 г мелени (пржени) лешници
*Од оваа смеса се печат вкупно 3 кори.
За крем 1 (чоколаден крем):
– 600 мл млеко
– 6 жолчки
– 70 г скроб/нишесте/густин
– 85 г шеќер
– 80 г путер
– 125 г темна чоколада
– 125 мл слатка павлака
За крем 2 (крем со Нутела и маскарпоне):
– 200-250 г маскарпоне
– 200-250 г Нутела
– 200-250 г мелени (пржени) лешници
– НМД
За декорација (по желба):
– Печени мелени лешници
– Парчиња Ferrero Rocher пралини
– Чоколаден ганаш
Постапка:
Подготовка на бисквитот:
1. Во чист сад изматете ги трите белки во цврст снег, постепено додавајќи ги трите лажици шеќер. Матете додека да добиете сјајна и густа смеса.
2. Во снегот внимателно додајте го какаото, мелените лешници и лебните трошки. Мешајте со шпатула со нежни движења за да ја задржите воздушноста на смесата.
3. Распоредете ја смесата рамномерно во два калапи со пречник од 20 см, обложени со хартија за печење. Јас сакав потенки кори, па доколку сакате малку подебели, користете по 4 белки.
4. Печете во загреана рерна на 180°C околу 10-15 минути или додека бисквитите да добијат златеста боја. Оставете ги да се изладат.
5. Повторете го процесот уште еднаш за да добиете 4 бисквити
Подготовка на крцкавите кори:
1. Пенасто изматете го путерот исечен на коцки со шеќерот во прав, па додајте ги останатите состојки и на крај лешниците.
2. Замесете меко тесто, завиткајте го во проѕирна фолија и оставете го да отстои во фрижидер најмалку 1 час.
3. Поделете го тестото на три еднакви дела. Секој дел отворете го во круг со пречник малку помал од 20 см.
4. Печете ги корите на плех обложен со хартија за печење во загреана рерна на 180-200°C, додека да добијат светлокрем боја (околу 8-10 минути). Оставете ги да се изладат.
Подготовка на крем 1 (чоколаден крем):
1. Во сад изматете ги жолчките со шеќерот и густинот, додавајќи малку од млекото за да добиете мазна смеса.
2. Останатото млеко загрејте го до вриење. Постепено додајте ја смесата од жолчки, мешајќи постојано за да не се создадат грутки.
3. Гответе на тивок оган додека кремот да се згусне. Тргнете го од оган и додајте го путерот. Покријте го со проѕирна фолија и оставете го да се излади.
4. На пареа растопете ја темната чоколада со слатката павлака. Оставете го ганашот да се излади, потоа изматете го и измешајте го со изладениот крем од жолчки.
Подготовка на крем 2 (крем со Нутела и маскарпоне):
1. Во сад ставете ги маскарпонето, Нутелата и слатката павлака. Матете со миксер додека не добиете мазен и кремаст крем.
Составување на тортата (оригинален рецепт – ОВДЕ:
https://www.instagram.com/p/CVdokJ7MWwL/?igsh=NG43dnp1dHRnNTdv
На подлога за торта ставете го првиот бисквит. Премачкајте го со крем 1. Врз кремот поставете една крцкава кора, а потоа премачкајте ја со крем 2. Повторете го процесот додека да го потрошите материјалот.
Завршете ја тортата со декорација по желба – посипете ја со мелени лешници, додајте парчиња Ferrero Rocher пралини или прелијте ја со чоколаден ганаш.
Оставете ја тортата во фрижидер најмалку 4 часа пред послужување за да се стегне и вкусовите да се соединат.
– За поинтензивен вкус на лешници, пред мелење лесно испечете ги лешниците во рерна.
– Доколку сакате повисока торта, зголемете ја количината на состојките за бисквитот и направете повеќе слоеви.
– Тортата е највкусна кога ќе отстои преку ноќ во фрижидер.
Оваа Фереро торта е вистинско уметничко дело што ќе ги освои срцата на сите што ќе ја пробаат. Уживајте во секој залак! Многу слична постапка и рецепт можете да погледнете во видео прилогот ОВДЕ:
