Со години ги проучувал милионерите и дошол до ова сознание врз основа на нивните животни навики. Економистот Том Корли поминал пет години проучувајќи ги навиките и животите на 223 милионери за да се обиде да добие увид во нивниот начин на размислување.
Овој Американец е експерт за финансиско планирање и е автор на неколку книги кои говорат за психологијата на богатите и начините на кои тие ги стекнале нивните финансиски придобивки.
Според неговите податоци, сите тие потекнуваат од различни средини и имале различни судбини и животни патишта, а сите поседуваат најмалку 160 илјади долари годишен бруто приход и околу 3,2 милиони нето средства.
„Посебно ме интересираше на што ги трошат парите. Речиси сите ми рекоа дека она што придонело за нивното богатство е тоа што престанале да трошат пари на одредени работи“, пишува Корли во својот текст на CNBC.
Тој наведува пет работи на кои милионерите никогаш не трошат пари:
1. Преработена и пакувана храна
Тие му даваат приоритет на своето здравје и штом се стекнале со пари, престанале да купуваат неквалитетна, преработена храна, а наместо тоа се одлучиле за органска и здрава храна без конзерванси.
Тие често биле во потрага по производи што може да се добијат таму каде што се одгледуваат, посетувајќи ги земјоделските пазари и продавниците познати по тоа што нудат висококвалитетни производи и месо.
2. Евтини производи
Не сакале да трошат пари на најновите модни трендови или евтин и лошо конструиран мебел. Наместо тоа, тие претпочитале да инвестираат во безвременски, квалитетни гардероби и мебел кој е изграден да трае.
Честопати цената била и до два или три пати повисока од гардеробите и мебелот со послаб квалитет. Но, сепак на долг рок, тоа било поевтино од постојаното заменување на евтини, лошо направени производи.
3. Големи поправки на домот или автомобилот
Во истиот дух, многу милионери признале дека претпочитаат да трошат пари на целосно заменување на некои работи како што се стари покриви, машини за перење или машини за миење садови, фрижидери, шпорети, па дури и автомобили, наместо да ги инвестираат своите средства во чести и скапи поправки.
Иако честопати тоа било далеку поскапо од поправката, сепак тие ги рационализирале трошоците – нешто ново трае многу подолго од нешто што веќе е поправено и во иднина ќе му требаат поправки.
4. Градинарски алат и опрема
Додека некои од нив сè уште уживале во работата на отворено, како што се косење тревници, средување, плевење, градинарство, огромното мнозинство најмиле градинари да се грижат за дворот откако ќе се збогатат.
Тоа значело и дека повеќе не трошеле пари за поправка или замена на стара опрема и алат. Она што го добиле на тој начин било и времето кое за нив е најскапоцено. Бидејќи повеќе не морале да одвојуваат по еден или два часа неделно за овие цели, имале повеќе време за одмор или релаксација.
5. Секакви игри на среќа
Многу милионери избегнувале каква било форма на коцкање додека го граделе своето богатство, а тој здрав разум се проширил и на нивните финансии.
Признале дека решиле да не трошат пари на игри на среќа бидејќи веројатноста да добијат нешто била многу мала, а тоа го гледале како губење пари. Наместо тоа, велат дека е подобро овие средства да се инвестираат во незаборавни искуства.
