Испробајте го подзаборавениот рецепт за домашен путер без адитиви и конзерванси, многу слично на начинот како што го приготвувале нашите предци, но полесно и поедноставно.
Иако постарите генерации веројатно се сеќаваат и знаат како се подготвува домашен путер, сепак добро би било повторно да го пренесеме овој едноставен домашен рецепт и да го сочуваме од заборав.
Домашниот путер има посебна слаткост и извонреден вкус, а трае исто време колку и купечкиот, по неколку седмици. Со други зборови, има долг рок на траење доколку го чувате правилно во фрижидер.
Она што е најважно кога станува збор за рокот на путерот, е дека не треба да има никаква останата влага во него, а најчесто се расипува ако го чувате директно изложен на светлина. Можеби новите домаќинки во кујната не помислиле некогаш да подготват домашен путер бидејќи купечкиот е секогаш лесно достапен.
Постарите порано го подготвувале путерот од полномасно млеко и со подолготрајна постапка, но денес повеќето го подготвуваат со млечниот производ наречен „неутрална павлака“, или за многумина познат како „хопла“. Јас го мачкам на лепче и не додавам ништо друго, ете толку ми е слатко што ми стана омилено јадење, а верувам дека ќе стане и ваше.
За да го подготвите домашниот путер ќе ви биде потребно само неутрална павлака или за многумина позната како „хопла“ со 30-35% масленост. Количината на неутрална павлака која е користена во рецептот е 2 литри течна павлака, а се добиваат 770 г путер.
Секако според количината на путер која сакате да ја добиете, одредете ја количината на неутралната павлака. Ова е вкусен рецепт за путер, прилагоден за сечиј вкус, а може да го користите во подготовка на пити, колачи, торти и разни други солени и благи јадења.
ПОСТАПКА: Во подлабок сад ставете ја хоплата. Вклучете го миксерот на најмала брзина и започнете да матите. Кога волуменот на масата ќе почне да се зголемува, постепено започнете да ја покачувате брзината на миксерот сè додека да стигнете до матење со најголемата можна брзина.
Павлаката во одреден момент ќе се претвори во густ шлаг, но се продолжува со матење додека путерот да почне да се одвојува од течноста, ќе забележите кога е доволно одвоена. Потоа земете една ситна цедалка (или густа газа) и ставате ја смесата за добро да се исцеди од течноста.
Течноста тргнете ја настрана, а путерот заедно со цедалката префрлете го врз друг сад со ладна вода и добро исплакнете го за да се прочисти. Формирајте топче со помош на шпатула и потоа путерот исцедете го со раце како сунѓер бидејќи не треба воопшто да остане течност.
Потоа путерот ставете го на проѕирна фолија и направете форма, правоаголна или како ролат. Добро завиткајте и затегнете со фолијата и ставете во фрижидер на 1 час да се стврдне. Потоа путерот е спремен за употреба.
Од преостаната течност може да направите урда, но треба да знаете како професионално се прави од бактериска култура. Сепак оваа течност е веќе ферментирана.. Деталите од целата постапка погледнете ги во видеото ОВДЕ.
