Сармата е омилено јадење речиси на сите луѓе од Балканот, но и пошироко. Најубавата се витка во лист од кисела зелка, но може да се витка и во било каков зелен лист: блитва, лозов лист, лист од леска…
Сармата од кисела зелка е зимско јадење кое порано често се приготвуваше. Нашите мајки и баби полнеа големи тенџериња, а потоа сармата крчкаше и мирисаше цела ноќ, на тивко…
Ова е рецепт за посна сарма, но според истиот рецепт може да се приготви и сарма со мелено месо, со тоа што, тоа се додава во пржениот кромид и праз, а врз сармата дополнително се редат парчиња димена сланина…
Потребни состојки:
1 главица кисела зелка
4 главици кромид
2 страка праз
3 филџани ориз
1 лажица црвена зачинска пиперка
1 лажица крупна лута или слатка толчена пиперка (буковец)
сол, црн пипер, ловоров лист, масло..
Постапка:
На масло пропржете го сечканиот кромид и праз, додадете го испраниот ориз и пржете на средна температура додека оризот да застакли. Зачинете со сол, црн пипер, слатка мелена пиперка и лута толчена пиперка (кој не сака луто, може да стави слатка).
На дното од садот во кој ќе се пече сармата ставете малку масло, малку ситно сечкана зелка од средишниот дел, па врз него се редат сармите. Подобро е кога сармите се помали, па затоа листовите сечете ги на помали делови и полнете ги со една рамна лажица фил.
Врз сармите ставете 2-3 ловорови листови и преку сармичките ставете цели листови зелка, за да останат внатре посочни. Прелијте ги со врела вода (околу два прста над сармата), малку намастете одозгора, покријте го садот со капак и ставете во рерна на 180 степени да се пече околу 3,5 до 4 часа. Решетката од рерната треба да биде поставена нешто пониско од средината.
Совет: Колку повеќе ќе ставите праз и кромид (па и кога е со месо), толку сармата е повкусна. Садот во кој ќе се пече е добро да биде повисок за да не претекува кога ќе зоврие. Ако ја приготвувате во земјен сад има уште поубав вкус.
Ако е посна сармата немојте да штедите на масло, и колку подолго се пече толку е повкусна. Нормално, температурата не треба да биде силна, туку умерена “да крчка на тивко”.
Кога ќе ги тргнете листовите, сармите под нив остануваат сочни, а никако препечени, а кога ќе ги извадите сармите цела течност ќе биде впиена, а ќе остане само вишокот масло.
Сармата може да се послужи топла и ладна, бидејќи е без месо. Со ваква сарма совршено одговара топло домашно испечено лепче.
Coolinarika.com
