Брзи панцероти за појадок или вечера
Овој рецепт за панцероти е идеално решение за вкусен и брз оброк што може да се подготви за само половина час.
Без чекање и без вишок масло, овие панцероти се меки, лесни и совршени за целото семејство.
Нивната едноставна подготовка и можноста за прилагодување на филот ги прават омилен избор за секоја пригода, пишува НМД. Еве што ви е потребно:
Потребни состојки
За тестото:
720 г меко брашно (тип 400)
1 лажица сол
10 г прашок за печиво
3 јајца
400 мл течен јогурт
Малку брашно за премесување и развлекување
Масло за пржење
За филот (по желба):
300 г шунка
150 г полутврд, топлив кашкавал
150 мл кечап со сок од домати
Оригано по вкус
НМД
Постапка
1. Во сад за месење ставете 720 г меко брашно и додајте една рамна лажица сол. Промешајте ги сувите состојки, па додајте 10 г прашок за печиво и повторно измешајте.
2. Во смесата додајте три јајца и 400 мл течен јогурт. Промешајте со лажица додека смесата стане влажна и хомогена. Доколку користите густ јогурт, исто така може да се употреби, но прилагодете ја количината на брашно.
3. Тестото месете го со лажица или рачно додека стане меко, но малку лепливо. Доколку е потребно, додајте уште малку брашно (еден до два прстофата) за да се олесни месењето.
Крупните јајца може да бараат повеќе брашно, додека помалите јајца помалку.
4. Откако тестото е измесено, покријте го и оставете го да отстои додека го подготвувате филот.
5. За филот, измешајте 300 г сечкана шунка, 150 г рендан полутврд кашкавал, 150 мл кечап со сок од домати и малку оригано.
Филот треба да биде густ за да не истекува при печењето. По желба, може да користите друг фил, како сирење со белка или комбинација по ваш вкус.
6. Посипете ја работната површина со малку брашно и извадете го тестото од садот.
Премесете го кратко, посипете го со малку брашно и развлечете го во кора со дебелина од околу 5 мм. Проверете дали има доволно брашно под тестото за да не се залепи.
7. На едниот крај од кората ставете од филот. Користете длабок сад или чинија за да го притиснете и исечете тестото во кружна форма.
Преклопете го тестото преку филот и нежно притиснете ги рабовите за да се затвори панцеротата. Повторете го процесот со остатокот од тестото и филот.
8. Доколку ви остане тесто без фил, развлечете го на дебелина од 1 см, исечете го на парчиња и испржете ги како празни пишии.
9. Во тава загрејте масло (0,5 до 1 см длабочина) на средно висока температура. Тестирајте ја температурата со малку брашно – ако зашушти, маслото е доволно загреано.
Намалете ја температурата на средна (на пример, 7 од 9) и ставете ги панцеротите да се пржат.
10. Пржете ги панцеротите по 2-3 минути од секоја страна додека д даобијат златна боја. Првата страна може да бара малку повеќе време, додека втората се пржи побрзо поради загреаното масло.
11. Готовите панцероти извадете ги на кујнска хартија за да се впие вишокот масло, иако тестото речиси и не го впива. Послужете ги топли.
Овие панцероти се меки, вкусни и подготвени за кратко време, што ги прави совршен избор за брз и вкусен оброк. Постапката погледнете ја во видео прилогот ОВДЕ:
