Рецепт за посни колач-кекси полнети со џем, без млеко и јајца кој го правам со години. Имаат неодолив вкус и мирис. Брзо се приготвуваат и можат да стојат многу долго. Всушност, колку подолго стојат, стануваат повкусни. Рецепт и видео презентација на Ивана од „Шерпица“.
Потребни состојки: 200 мл млака вода, 150 мл масло, 10 г ванилин шеќер (или арома-екстракт од ванила), 10 г прашок за печиво, 1 лажичка оцет, околу 500-550 г брашно, околу 100 г џем или неколку лажици (џем по ваш вкус, но гледајте да изберете некој погуст), шеќер во прав за наросување одозгора
![](https://nmd.mk/wp-content/uploads/2021/04/IMG_2778.jpg)
![](https://nmd.mk/wp-content/uploads/2021/04/IMG_2779.jpg)
Постапка: Во подлабок сад ставете вода, масло, оцет, ванилин шеќер и прашок за печиво. Промешајте да се растопат и соединат состојките.
Во течната смеса додајте го брашното. Со постепено додавање на брашното замесете меко (масно на допир) тесто кое не се лепи за ѕидовите од садот.
![](https://nmd.mk/wp-content/uploads/2021/04/IMG_2780.jpg)
Во тестото не се става обичен шеќер, туку само ванилин шеќер, а не мора ни тој да го ставите, доволно е и арома доколку имате. Колачите на крај се доволно слатки од шеќерот во прав со кој се наросуваат. Откако добро ќе го замесите тестото, оставете го покриено да одмори 10 минути.
![](https://nmd.mk/wp-content/uploads/2021/04/IMG_2781.jpg)
![](https://nmd.mk/wp-content/uploads/2021/04/IMG_2782.jpg)
После 10 минути само малку премесете го и ќе забележите колку тестото ќе стане убаво и мазно. Затоа, не претерувајте со брашното, доволни се 500 грама, максимум 550 г. Топката тесто спуштете ја на убаво набрашнета површина, па и него наросете го одозгора со малку брашно.
![](https://nmd.mk/wp-content/uploads/2021/04/IMG_2783.jpg)
![](https://nmd.mk/wp-content/uploads/2021/04/IMG_2784-e1619574638960.jpg)
Со помош на оклагија развлечете тенка кора со дебелина од 5-8 мм, па одберете чаша со која вадите кругови. За помали колачи користете чаша со пречник од 6 см или за нешто поголеми, со пречник од 8 см. Сепак јас ја користам помалата чаша, затоа што колачињата ми се поубави кога се помали.
![](https://nmd.mk/wp-content/uploads/2021/04/IMG_2785.jpg)
![](https://nmd.mk/wp-content/uploads/2021/04/IMG_2786-e1619574690877.jpg)
Сечете ги круговите со чашата и тргајте ги на страна, а остатоците од тестото соберете ги, премесете ги и повторете ја постапката: развлечете кора, сечете кругови и сè така додека да се потроши целото тесто. На секое тркалце покрај крајот ставете по една лажичка џем.
![](https://nmd.mk/wp-content/uploads/2021/04/IMG_2787-e1619574745614.jpg)
![](https://nmd.mk/wp-content/uploads/2021/04/IMG_2788-e1619574789179.jpg)
![](https://nmd.mk/wp-content/uploads/2021/04/IMG_2789-e1619574843127.jpg)
![](https://nmd.mk/wp-content/uploads/2021/04/IMG_2790-e1619574896243.jpg)
Преклопете го колачето на половина, па со помош на виљушка залепете ги краевите за да не излегува џемот. Затоа, не ставајте премногу џем, затоа ќе се разлее и нема да можете да споите краевите. Плехот од рерна обложете го со хартија за печење, па во него редете ги приготвените колачиња.
![](https://nmd.mk/wp-content/uploads/2021/04/IMG_2793.jpg)
![](https://nmd.mk/wp-content/uploads/2021/04/IMG_2794.jpg)
Ставете да се печат во претходно загреана рерна на 200 степени околу 30-35 минути. Печените колачи извадете ги од рерна и уште додека сè уште се топли, сите ставете ги во еднен поголем сад и одозгора наросете ги со шеќер во прав. Деталите можете да ги погледнете во видеото ОВДЕ.
![](https://nmd.mk/wp-content/uploads/2021/04/IMG_2795.jpg)